18 قاڭتاردان 19 قاڭتارعا قاراعان ءتۇنى پراۆوسلاۆ حريستياندارى باستى ءدىني مەرەكەلەردىڭ ءبىرى – كرەششەنيە گوسپودنە اتاپ وتەدى. وسىعان بايلانىستى ەلوردادا قالا تۇرعىندارى مەن سەنۋشىلەردىڭ قاتىسۋىمەن ءدىني ءىس-شارالار ءوتىپ جاتىر، دەپ حابارلايدى «ادىرنا» ءتىلشىسى قالا اكىمدىگىنىڭ رەسمي سايتىنا سىلتەمە جاساپ.
ءدىني ءىس-شارالار ۋسپەن كافەدرالدى سوبورىندا (كۇيشى دينا كوشەسى، 27), كونستانتين-ەلەنا شىركەۋىندە (رەسپۋبليكا داڭعىلى، 12) جانە سەرافيم ساروۆ عيباداتحاناسىندا (بوگەنباي باتىر داڭعىلى، 8) ءوتىپ جاتىر.
«جۇزدەگەن ەلوردا تۇرعىنى مەن قالا قوناقتارى سۋعا ءتۇسۋ ءۇشىن جاپپاي شومىلۋ ورىندارىنا جينالدى. استانادا مۇنداي شومىلۋ ورىندارى ەسىل وزەنىنىڭ سول جاعالاۋىندا، «استانالىق» ساياباعى جاعالاۋىنداعى ورتالىق جاعاجاي ماڭىندا ارنايى مۇز ويىقتارى جابدىقتالعان»،- دەلىنگەن حابارلامادا.
سۋعا ءتۇسۋ ورىندارى ارنايى ءىس-شارادان كەيىن، ساعات 20:00-دەن باستاپ قولجەتىمدى بولىپ، 19 قاڭتار كۇنى ساعات 02:00-گە دەيىن جۇمىس ىستەيدى. شومىلۋ ورىندارى قاۋىپسىز باسپالداقتارمەن جانە قورشاۋلارمەن جابدىقتالعان. ازاماتتاردىڭ ىڭعايى ءۇشىن اۋماعى جارىقتاندىرىلىپ، جىلىنۋ پۋنكتەرى ۇيىمداستىرىلعان.
قوعامدىق ءتارتىپ پەن قاۋىپسىزدىكتى قامتاماسىز ەتۋ ماقساتىندا جاۋاپتى قىزمەتتەردىڭ تاۋلىك بويعى كەزەكشىلىگى ۇيىمداستىرىلعان. قاۋىپسىزدىككە توتەنشە جاعدايلار دەپارتامەنتى مەن پوليتسيا دەپارتامەنتىنىڭ قىزمەتكەرلەرى تارتىلعان. سونىمەن قاتار سۋعا ءتۇسۋ ورىندارىندا جەدەل مەديتسينالىق جاردەم بريگادالارى كەزەكشىلىك ەتۋدە.
قۇتقارۋ بولىمشەلەرى سۋداعى قاۋىپسىزدىك ەرەجەلەرىنىڭ ساقتالۋىن قاداعالايدى. قاجەت بولعان جاعدايدا ماماندار ازاماتتاردى جىلىنۋ پۋنكتەرىنە ورنالاستىرىپ، مەديتسينالىق كومەك كورسەتۋگە دايىن.
ايتا كەتەيىك، ءدىني ءىس-شارا 19 قاڭتار كۇنى ساعات 23:00-گە دەيىن جالعاسادى.
