مەملەكەت باسشىسىنىڭ تاپسىرماسى بويىنشا ازىرلەنگەن بانكتەر تۋرالى جاڭا زاڭ قارجىلىق-تەحنولوگيالىق سەكتوردى ودان ءارى دامىتۋ جانە تسيفرلىق قارجى اكتيۆتەرىن رەتتەۋ ءۇشىن جاعداي جاسايدى.
قازىرگى ۋاقىتتا قارجىلىق قىزمەتتەردى ۇسىنۋدىڭ جاڭا مودەلدەرى، ونىڭ ىشىندە ماركەتپلەيستەر ارقىلى قارجىلىق قىزمەتتەر كورسەتۋ جانە بانكتەردىڭ قارجىلىق-تەحنولوگيالىق كومپانيالارمەن ءوزارا ارەكەتى بەلسەندى دامىپ كەلەدى. بانكتەر تۋرالى زاڭدا بانكتەردىڭ تسيفرلىق تەحنولوگيالار، ەلەكتروندىق كوممەرتسيا، كيبەرقاۋىپسىزدىك، بيومەتريا، جاساندى ينتەللەكت جانە تەلەكوممۋنيكاتسيا سالالارىندا جۇمىس ىستەيتىن قارجىلىق-تەحنولوگيالىق كومپانيالاردىڭ كاپيتالىنا ينۆەستيتسيالاۋ جونىندەگى مۇمكىندىكتەرىن كەڭەيتۋ كوزدەلگەن. بۇل رەتتە مۇنداي ينۆەستيتسيالار ءۇشىن بانكتەردىڭ كورسەتىلگەن كومپانيالاردىڭ كاپيتالىنا قاتىسۋ مولشەرى مەن ۇلەسى بويىنشا ليميتتەر بەلگىلەنەتىن بولادى.
بانك ءوزىنىڭ تەحنولوگيالىق ينفراقۇرىلىمىن وزگە ۇيىمعا بەرۋ جولىمەن بانك قىزمەتىن جۇزەگە اسىرۋ كەزىندە وسى ۇيىمنىڭ كليەنتتەرى الدىندا بانك قىزمەتتەرىن تيىسىنشە كورسەتكەنى ءۇشىن دەربەس جاۋاپتى بولادى.
زاڭنىڭ نەگىزگى جاڭالىعى – اكتيۆتەردىڭ جاڭا كلاسى رەتىندە تسيفرلىق قارجى اكتيۆتەرىن (تسقA) رەتتەۋدى ەنگىزۋ. زاڭدا تسيفرلىق قارجى اكتيۆتەرىنىڭ ءۇش ءتۇرى كوزدەلگەن: ءبىرىنشىسى – اقشاعا تالاپ ەتۋ قۇقىعىن راستايتىن تسيفرلىق اكتيۆتەر، ياعني – ستەيبلكويندەر، ەكىنشىسى – بازالىق اكتيۆپەن قامتاماسىز ەتىلگەن تسيفرلىق قارجى اكتيۆتەرى جانە ءۇشىنشىسى – تسيفرلىق نىساندا شىعارىلاتىن قارجى قۇرالدارى.
ستەيبلكويندەردىڭ شىعارىلىمىن جانە اينالىسىن ۇلتتىق بانك رەتتەيدى. اگەنتتىكتىڭ بازالىق اكتيۆپەن قامتاماسىز ەتىلگەن تسيفرلىق اكتيۆتەردى جانە تسيفرلىق نىساندا شىعارىلاتىن قارجى قۇرالدارىن شىعارۋعا جانە اينالىسىنا قويىلاتىن تالاپتاردى بەلگىلەۋ جونىندەگى وكىلەتتىكتەرى ەنگىزىلەدى. تسيفرلىق قارجى اكتيۆتەرىن شىعارۋدى تسيفرلىق پلاتفورمالار وپەراتورلارى جۇزەگە اسىراتىن بولادى. بۇل قارجى نارىعىنىڭ جاڭا سۋبەكتىلەرى، ولاردىڭ قىزمەتىن ۇلتتىق بانك ليتسەنزيالايدى.
تسيفرلىق قارجى اكتيۆتەرىنە ءداستۇرلى قارجى قۇرالدارى ءۇشىن بەلگىلەنگەن ۇقساس تالاپتار، ونىڭ ىشىندە تاۋەكەلدەردى باسقارۋعا، اقپاراتتى اشۋعا جانە ينۆەستورلاردىڭ قۇقىقتارىن قورعاۋعا قاتىستى تالاپتار قويىلاتىن بولادى. بۇل ولاردىڭ اينالىسىنىڭ اشىقتىعى مەن سەنىمدىلىگىن قامتاماسىز ەتۋگە مۇمكىندىك بەرەدى.
زاڭدا قامتىلعان تۇزەتۋلەردىڭ ەداۋىر بلوگى ۇلتتىق قارجى ينفراقۇرىلىمىن جاڭعىرتۋعا باعىتتالعان. تسيفرلىق تەڭگەنىڭ ۇلتتىق ۆاليۋتانىڭ جاڭا نىسانى رەتىندەگى مارتەبەسى زاڭنامالىق تۇردە بەكىتىلەدى. تسيفرلىق تەڭگەنىڭ اينالىسى جانە ونى پايدالانۋ ءتارتىبىن ۇلتتىق بانك ايقىندايدى.
بۇدان باسقا، تولەم ۇيىمدارىنىڭ قىزمەتىن رەتتەۋدى كۇشەيتۋ كوزدەلەدى. ولاردىڭ كاپيتالى مەن تاۋەكەلدەردى باسقارۋ جۇيەسىنە قوسىمشا تالاپتار بەلگىلەۋ جوسپارلانۋدا.
بانكتەر تۋرالى جاڭا زاڭدا تەحنولوگيالىق وزگەرىستەر، ەكونوميكانى قارجىلاندىرۋداعى بانك سەكتورىنىڭ ءرولىن ارتتىرۋ، باسەكەلەستىكتى كۇشەيتۋ جانە نارىققا جاڭا قاتىسۋشىلاردى تارتۋ، سونداي-اق قارجىلىق تەحنولوگيالاردى ىلگەرىلەتۋ جانە تسيفرلىق اكتيۆتەردىڭ اينالىمىن ىرىقتاندىرۋ ماسەلەلەرى ەسكەرىلەدى.
