25 شىلدە كۇنى يراننىڭ «Nahid-2» عىلىمي-زەرتتەۋ جانە تەلەكوممۋنيكاتسيالىق جەرسەرىگى رەسەيدىڭ «سويۋز» زىمىرانى ارقىلى عارىشقا ءساتتى ۇشىرىلدى، دەپ حابارلايدى "ادىرنا" ۇلتتىق پورتالى.
بۇل ۇشىرۋ رەسەيدىڭ «ۆوستوچنىي» عارىش ايلاعىنان جۇزەگە اسىرىلدى.
جوبا يران عارىش اگەنتتىگىنىڭ (يكا) تاپسىرىسى بويىنشا جۇرگىزىلىپ، يران عارىشتىق زەرتتەۋلەر ورتالىعىمەن بىرلەسىپ ازىرلەنگەن. ۇشىرۋ كوپجەرسەرىكتىك حالىقارالىق ميسسيا اياسىندا ءوتتى. بۇل ميسسياعا رەسەيدىڭ «يونوسفەرا-م3» جانە «يونوسفەرا-م4» سپۋتنيكتەرى مەن وزگە ەلدەردىڭ تاعى 18 جەرسەرىگى كىردى.
ۇشىرۋ بارىسىندا زىمىراننىڭ كورپۋسىنا يران عارىش اگەنتتىگىنىڭ رەسمي ەمبلەماسى سالىنعانى ەرەكشە نازار اۋدارتتى. بۇل يراننىڭ حالىقارالىق عارىشتىق ميسسياعا رەسمي قاتىسۋىنىڭ بەلگىسى رەتىندە قاراستىرىلدى.
«Nahid-2» جەرسەرىگى بەس جىل بويى وربيتادا جۇمىس ىستەۋگە ارنالعان. ونىڭ باستى ەرەكشەلىگى – وربيتا بيىكتىگىن وزدىگىنەن رەتتەي الاتىن قوزعالتقىش قوندىرعىسىنىڭ بولۋى. بۇل جۇيە جەردىڭ تارتىلىس كۇشىنە بايلانىستى وربيتادان اۋىتقىماۋعا كومەكتەسەدى. قوزعالتقىش يراندا تولىقتاي ىشكى رەسۋرستارمەن جاسالعان جانە كومپوزيتتىك وتىن باگى، جوعارى قىسىمدى كلاپاندار، ءدال باسقارىلاتىن قوزعالتقىشتار سىندى الدىڭعى قاتارلى تەحنولوگيالاردى قامتيدى.
سونىمەن قاتار، سپۋتنيك جىلۋ وقشاۋلاۋ مەن ەلەكترلىك تۇراقتىلىقتى قامتاماسىز ەتەتىن پوليمەر جابىندارى جانە ارنايى عارىشتىق جەلىمدەرمەن قاپتالعان. قۋات كوزى رەتىندە وندا يراندا جاسالعان ۇزاقمەرزىمدى ليتي-يوندى اككۋمۋلياتورلار ورناتىلعان
