İrandaǧy soŋǧy narazylyq aksiialaryna bailanysty BŪŪ Qauıpsızdık keŋesı şūǧyl otyrys ötkızdı. Būl jiyn AQŞ bastamasymen şaqyrylyp, İrandaǧy jaǧdai halyqaralyq qauıpsızdık tūrǧysynan talqylandy.
BŪŪ janyndaǧy AQŞ-tyŋ tūraqty ökılı Maik Uolts öz sözınde İran bilıgın azamattarǧa qarsy zorlyq-zombylyq körsetıp, jappai quǧyn-sürgın jürgızıp otyr dep aiyptady. Onyŋ aituynşa, rejimnıŋ öz halqyna qarsy qoldanǧan küş deŋgeiı ışkı mäsele şeŋberınen asyp, halyqaralyq beibıtşılık pen qauıpsızdıkke tıkelei äser ete bastaǧan.
Uolts Tegeran bilıgı būl jaǧdaidy «özımızdıŋ ışkı ısımız» retınde körsetuge tyrysatynyn aitty. Alaida ol mūndai ūstanymdy «mülde jalǧan ärı adastyratyn pıkır» dep baǧalady. Sondai-aq qazırgı jaǧdai BŪŪ Qauıpsızdık keŋesınıŋ tıkelei nazaryn jäne aralasuyn talap etetının jetkızdı.
«İran halqy İslam Respublikasynyŋ bükıl tarihynda būryn-soŋdy bolmaǧan deŋgeide erkındık talap etıp otyr», – dedı diplomat.
BŪŪ-da İrandaǧy ahualǧa qatysty ötken otyrysta AQŞ-tyŋ BŪŪ janyndaǧy tūraqty ökılı Maik Uolts elde jalǧasyp jatqan jappai narazylyqtarǧa bailanysty mälımdeme jasap, Vaşingtonnyŋ ūstanymyn jariia ettı. Ol köşege şyǧyp jatqan azamattardyŋ qarusyz ärı beibıt ekenın atap ötıp, AQŞ İran halqyn qoldaitynyn jetkızdı.
Uoltstyŋ aituynşa, narazylyqqa şyqqan adamdar – öz elın süietın patriottar jäne jaqsy bolaşaq üşın zaŋdy talaptar qoiyp otyrǧan azamattar.
«Köşege şyqqan adamdar – qarusyz ärı beibıt tūrǧyndar. Olar öz elın süietın jäne jaqsy bolaşaq üşın zaŋdy talaptar qoiyp otyrǧan patriottar», – dedı AQŞ ökılı.
Ol sondai-aq AQŞ prezidentı Donald Tramp pen Amerika Qūrama Ştattary İrannyŋ batyl halqyna qoldau bıldıretının mälımdedı.
