يراندا وتكەن نارازىلىقتان شامامەن ەكى مىڭ ادام قازا تاپقان، دەپ حابارلايدى "ادىرنا" ۇلتتىق پورتالى Reuters اگەنتتىگىنە سىلتەپ.
اگەنتتىكتىڭ حابارلاۋىنشا، قازا تاپقانداردىڭ ىشىندە نارازىلىق بىلدىرۋشىلەردەن بولەك ەلدىڭ قاۋىپسىزدىك قىزمەتكەرلەرى دە بار. بۇل تۋرالى ەلدىڭ رەسمي وكىلى مالىمدەگەن.
اگەنتتىك اتاپ وتكەندەي، بۇل – ەل بيلىگىنىڭ جالپىۇلتتىق تارتىپسىزدىكتەر ناتيجەسىندە كوپ ادامنىڭ قازا بولعانىن العاش رەت رەسمي تۇردە مويىنداۋى.
جاپپاي نارازىلىقتار 2025 جىلعى جەلتوقسان ايىنىڭ سوڭىندا ۇلتتىق ۆاليۋتانىڭ قۇنسىزدانۋىنا بايلانىستى باستالعان. اكىمشىلىك ورگاندار جاۋاپ رەتىندە قاۋىپسىزدىك شارالارىن كۇشەيتىپ، پوليتسيانىڭ كوز جاسىن كەلتىرەتىن گازىن جانە اۋا تاپانشاسىن پايدالانعان.
ەڭ ءىرى نارازىلىقتارتەگەران قالاسىندا وتكەن، ال ەڭ قاتاڭ قاقتىعىستار ەلدىڭ باتىسى مەن وڭتۇستىك-باتىسىندا – مالەكشاح، كەرمانشاح جانە لوردەگان قالالارىندا تىركەلگەن.
اقش-تا ورنالاسقان HRANA ادام قۇقىقتارى ۇيىمىنىڭ مالىمەتى بويىنشا، دۇيسەنبى كۇنى 10 مىڭ 700-دەن استام تۇتقىنداۋ فاكتىسى تىركەلگەن، بىراق بۇل ساندار رەسمي تۇردە راستالعان جوق.
وسىعان بايلانىستى يران وپپوزيتسيالىق Iran International ۆەب-سايتى ناقتى قازا تاپقاندار سانى 12 مىڭعا جەتۋى مۇمكىن ەكەنىن مالىمدەدى.
ايتا كەتەيىك، يراندا كۇشتىك قۇرىلىم وكىلدەرىنەن قازا تاپقان «شاھيدتەردى» ەسكە الۋعا ارنالعان ءۇش كۇندىك ۇلتتىق ازا جاريالانعانى تۋرالى حابارلاعان ەدىك.
ال 9 قاڭتارعا قاراعان ءتۇنى وتكەن نارازىلىقتار كەزىندە ەلدە 50-دەن استام بانك پەن بىرنەشە مەملەكەتتىك مەكەمە ورتەلگەن. سونداي-اق، ءورت سالدارىنان 30-دان اسا مەشىت جويىلعانى تۋرالى اقپارات تاراعان.
ەلدە 9 قاڭتاردان بەرى ينتەرنەت تولىقتاي ءوشىرىلدى، تەلەفون بايلانىسى توقتاتىلعان. مەملەكەتتىك اقپارات قۇرالدارى رەسمي تۇلعالارعا سىلتەپ نارازىلىق بارىسىندا قازا تاپقانداردىڭ كىناسىن "تەرروريستەرگە" اۋدارىپ وتىر. نارازىلىققا شىققانداردى يران باسشىلارى "تەرروريستەر", "بۇزاقىلار" جانە "ەكسترەميستەر" دەپ اتاپ وتىر.
