ەرجان قازىحان اقش-پەن ىنتىماقتاستىق بويىنشا قر پرەزيدەنتىنىڭ وكىلى بولدى، دەپ حابارلايدى "ادىرنا" ۇلتتىق پورتالى.
بۇۇ جانىنداعى قازاقستاننىڭ تۇراقتى وكىلى ەرجان قازىحانعا تاعى ءبىر مىندەت جۇكتەلدى.
"مەملەكەت باسشىسىنىڭ وكىمىمەن جەنەۆاداعى بىرىككەن ۇلتتار ۇيىمىنىڭ بولىمشەسى مەن باسقا دا حالىقارالىق ۇيىمدار جانىنداعى قازاقستان رەسپۋبليكاسىنىڭ تۇراقتى وكىلى ەرجان حوزەۇلى قازىحانعا امەريكا قۇراما شتاتتارىمەن ىنتىماقتاستىقتىڭ وزەكتى ماسەلەلەرى بويىنشا كەلىسسوزدەر پروتسەسىندە قازاقستان رەسپۋبليكاسى پرەزيدەنتىنىڭ وكىلى مىندەتتەرى جۇكتەلدى", - دەپ حابارلايدى اقوردا ءباسپاسوز قىزمەتى.
بۇدان الدىن اقش پرەزيدەنتى دونالد ترامپ يرانمەن ساۋدا قاتىناسىن جۇرگىزەتىن بارلىق ەلدەرگە 25 پايىزدىق كەدەندىك باج سالىعىن ەنگىزەتىنىن مالىمدەگەنى بەلگىلى.
ترامپ بۇل تۋرالى اقپاراتتى Truth Social الەۋمەتتىك جەلىسىندە حابارلاعان.
«وسى ساتتەن باستاپ يسلام رەسپۋبليكاسىمەن — يرانمەن — بيزنەس جۇرگىزەتىن كەز كەلگەن ەل اقش-پەن جاسالاتىن بارلىق كوممەرتسيالىق وپەراتسيالار ءۇشىن 25 پايىزدىق باج سالىعىن تولەيدى. بۇل شەشىم تۇپكىلىكتى جانە قايتا قاراۋعا جاتپايدى»، - دەپ جازعان اق ءۇي باسشىسى 12 قاڭتاردا.
