اتىراۋ وبلىسىندا زەينەت جاسىنداعى ەرلى-زايىپتىلاردىڭ ولىمىنە قاتىستى تەرگەۋ جالعاسىپ جاتىر، دەپ حابارلايدى "ادىرنا" ۇلتتىق پورتالى.
وسىعان دەيىن مارقۇمداردىڭ دەنەسى ءوز ۇيلەرىنىڭ اۋماعىنان، سارايدىڭ ىشىنەن تابىلعان.
تۋىستارىنىڭ ايتۋىنشا، قىلمىس ورنىن بەلگىسىز بىرەۋلەر تازالاۋعا تىرىسقان.
«سارايدىڭ ىشىندە ديۆان تۇرعان. سول ديۆاننىڭ استىنان اعام مەن ونىڭ ايەلىنىڭ دەنەسىن تاپتىق. ەدەن قازىلىپ، شامامەن 1,2–1,3 مەتر تەرەڭدىكتە شۇڭقىر جاسالعان. مايىتتەردىڭ ءۇستىن كيىزبەن جاۋىپ، ۇستىنە ەكى ورىندىق ديۆان قويىپتى. ءبىز ولاردى بۇكىل اۋىل بولىپ ىزدەپ ءجۇرىپ تاپتىق. تەكسەرۋ بارىسىندا سارايدىڭ ىشكى قابىرعالارىندا قان شاشىراعان ىزدەر بولعانى انىقتالدى، ولاردى ءسۇرتىپ تاستاعان. ىزدەر انىق كورىنبەسە دە، لينولەۋمگە قان ءسىڭىپ كەتكەنى بايقالدى. مۇنىڭ ءبارىن جاسىرۋ ءۇشىن ۇستىنە كىلەمدەر توسەگەن»، – دەدى مارقۇم ەر ادامنىڭ اپكەسى فاريزات كەنجەعاليەۆا.
اتىراۋ وبلىستىق پوليتسيا دەپارتامەنتى الەۋمەتتىك جەلىلەردە تاراعان ءتۇرلى قاۋەسەتتەرگە قاتىستى تۇسىنىكتەمە بەردى. ۆەدومستۆونىڭ ءباسپاسوز حاتشىسى مەيىرىم ەرداۋلەت ەرلى-زايىپتىلاردىڭ تۇنشىقتىرىلماعانىن، كەرىسىنشە، پىشاق جاراقاتتارى انىقتالعانىن مالىمدەدى.
«الەۋمەتتىك جەلىلەردە ءتۇرلى نۇسقالار تارادى. ساراپتاما ناتيجەسى بويىنشا مارقۇمداردىڭ دەنەسىنەن پىشاقپەن سالىنعان كەسىپ-تەسكەن جاراقاتتار تابىلدى. مايىتتەر سوت-مەديتسينالىق ساراپتاماعا جىبەرىلدى. قازىرگى تاڭدا جاراقاتتاردىڭ ناقتى سانى، ءولىم سەبەبى مەن قىلمىستىڭ ۋاقىتى انىقتالىپ جاتىر»، – دەدى ول.
بۇعان دەيىن حابارلانعانداي، بۇل ءىس بويىنشا نەگىزگى كۇدىكتى – قازا تاپقانداردىڭ كۇيەۋ بالاسى، 29 جاستاعى سۇلتان سارسەماليەۆ. ول حالىقارالىق ىزدەۋگە جاريالانعان.
