ەلدەگى ەپيد-احۋالدىڭ كۇرت ناشارلاۋىنىڭ كەسىرىنەن ەنگىزىلگەن كارانتينگە بايلانىستى مەملەكەت، قازاقستاندىقتارعا 42 500 تەڭگە تولەنەتىنى نە تولەنبەيتىنى تۋرالى اقپارات بەردى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى مالىمدەگەن ەدى.
رەسمي ساۋالعا جاۋاپ رەتىندە ەڭبەك مينيسترلىگى، قازاقستاندىقتارعا 42 500 تەڭگە قايتا بەرۋ جوسپارلانباعانىن ايتتى.
«قىسقا مەرزىمدى شەكتەۋ شارالارى بەلگىلى ءبىر قىزمەت تۇرلەرىنە، نەگىزىنەن دەمالىس كۇندەرىنە عانا قازاقستاننىڭ كەي ايماقتارىندا ەنگىزىلگەن. كاسىپكەرلىكتى قولداۋ بۇگىندە ءتۇرلى سالىق جەڭىلدىكتەرىمەن جانە جەڭىلدەتىلگەن شارالارمەن (سالىق جانە باسقا ەسەپ بەرۋ، تەكسەرۋ قىزمەتىنە موراتوري) ۇسىنىلعان. وسىعان بايلانىستى، بۇگىنگى كۇنگە دەيىن 42 500 تولەۋدى قالپىنا كەلتىرۋ تۋرالى ماسەلە قاراستىرىلماعان »، دەپ جاۋاپ بەردى دەپارتامەنت.
مينيسترلىك بىلتىر توتەنشە جاعداي مەن كارانتينگە، قىزمەتكە قويىلعان شەكتەۋلەرگە بايلانىستى كىرىستەرىن جوعالتقان جۇمىس ىستەيتىن ازاماتتارعا مەملەكەتتىك الەۋمەتتىك ساقتاندىرۋ قورى ەسەبىنەن 42 500 تەڭگە مولشەرىندە الەۋمەتتىك تولەم جاسالعانىن ەسكە ءتۇسىردى.
«بۇل بۇرىن-سوڭدى بولماعان جۇمىس ىستەيتىن ازاماتتاردى قولداۋ شاراسى بولدى. جالپى العاندا، 4,6 ميلليوننان استام ادام، بۇل تولەمدى جالپىلاي 476,3 ميلليارد تەڭگەگە الدى»، دەپ تولىقتىردى مينيسترلىك. بۇل تۋرالى 2020 جىلدىڭ قاراشا ايىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى.
"ادىرنا" ۇلتتىق پورتالى
