تيمۋر ەلەۋسىزوۆ «جاسىل-الماتى» باسشىسى بولىپ تاعايىندالدى. بۇل تۋرالى قالا اكىمدىگى جازدى، دەپ حابارلايدى «ادىرنا» ءتىلشىسى.
شاھار باسشىسى دارحان ساتىبالدىنىڭ تاپسىرماسىمەن قۇرىلعان مەكەمە قالا اۋماعىنداعى ساياباقتاردى، سكۆەرلەردى جانە جاعالاۋلاردى كۇتىپ ۇستاۋ مەن قىزمەت كورسەتۋمەن اينالىسادى.
جاڭا قۇرىلىمنىڭ نەگىزگى مىندەتى — جاسىل اۋماقتارعا جۇيەلى كۇتىم جاساۋ، ءتارتىپ ورناتۋ، سونداي-اق ولاردى كۇتىپ ۇستاۋ بويىنشا جاۋاپكەرشىلىكتى ناقتى بولە وتىرىپ، تاجىريبەلىك ناتيجەگە باعىتتالعان بىرىڭعاي ءتاسىلدى قالىپتاستىرۋ.
«جاسىل-الماتى» كمم-ءنى قۇرۋ تۋرالى شەشىم قالاداعى جاسىل قوردى باسقارۋ سالاسىندا جيناقتالعان ماسەلەلەردى، بىرىڭعاي وپەراتوردىڭ بولماۋىن جانە جاسىل جەلەكتەرگە كۇتىم جاساۋداعى بىتىراڭقى ءتاسىلدى ەسكەرە وتىرىپ قابىلداندى»،- دەلىنگەن حابارلامادا.
ايتا كەتەيىك، «جاسىل-الماتى» – «زەلەنسترويدىڭ» زاماناۋي بالاماسى.
39 جاستاعى تيمۋر ەلەۋسىزوۆ تۇران ۋنيۆەرسيتەتىن «قۇقىقتانۋ» ماماندىعى بويىنشا تامامداعان. 2000-2019 جىلدارى ارالىعىندا «قازاقستان قاۋىمداستىقتارى مەن كاسىپورىندارى وداعى «تابيعات» جم جوبالاردىڭ ۇيلەستىرۋشى-مەنەدجەرى، توراعانىڭ ورىنباسارى بولىپ جۇمىس ىستەدى. 2019 جىلدان باستاپ «Eco Fund Tabigat» جق نەگىزىن قالاۋشى، قۇرىلتايشىسى، توراعاسى بولدى. 2021 جىلدان باستاپ «Kaz Eco Patrol» قب نەگىزىن قالاۋشى، قۇرىلتايشىسى، توراعاسى، «اوك» توراعاسى (قازاقستاننىڭ كوگالداندىرۋ قاۋىمداستىعى) بولىپ قىزمەت اتقاردى. 2020 جىلدان باستاپ ەكو-امباسسادور. «سوسنوۆىي بور الماتى» قوعامدىق ەكوپاركىنىڭ نەگىزىن قالاۋشى. پارلامەنت ءماجىلىسىنىڭ جانىنداعى «وسىمدىكتەر الەمى تۋرالى» جانە «وسىمدىك الەمى ماسەلەلەرى بويىنشا قر كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» قر زاڭدارىنىڭ جوبالارى بويىنشا قورىتىندىلار دايىنداۋ جونىندەگى جۇمىس توبىنىڭ مۇشەسى. پارتياعا مۇشە ەمەس. 2023 جىلدىڭ ناۋرىز ايىنان باستاپ VIII سايلانىم بويىنشا الماتى قالاسى ءماسليحاتىنىڭ دەپۋتاتى.
