وزبەكستان پرەزيدەنتى شاۆكات ميرزيوەۆ ءوزىنىڭ ۇلكەن قىزى سايدا ميرزيوەۆانى پرەزيدەنت اكىمشىلىگىنىڭ باسشىسى ەتىپ تاعايىندادى، دەپ حابارلايدى "ادىرنا".
بۇل لاۋازىم 2023 جىلى تاراتىلعان بولاتىن، الايدا ەندى رەسمي تۇردە قايتا قالپىنا كەلتىرىلدى.
سوڭعى ەكى جىلدا سايدا ميرزيوەۆا پرەزيدەنتتىڭ كومەكشىسى قىزمەتىن اتقارىپ، باسقارۋ ۇدەرىسىنە بەلسەندى قاتىسىپ كەلدى، سونداي-اق حالىقارالىق ارەنادا ەلدى تانىستىرۋمەن اينالىستى. سوڭعى ءبىر جىل ىشىندە ول بىرنەشە ەلگە بارىپ، قازاقستان پرەزيدەنتى دە بار مەملەكەت باسشىلارىمەن كەزدەسۋلەر وتكىزدى.
ساياسي ساراپشىلار سايدا ميرزيوەۆانى اكەسىنىڭ ىقتيمال مۇراگەرى رەتىندە ءجيى اتاي باستادى. ونىڭ وسىنداي جوعارى لاۋازىمعا كوتەرىلۋى بۇل بولجامدى كۇشەيتە ءتۇستى.
ايتا كەتسەك، سايدا ميرزيوەۆا 40 جاستا. ول ەكونوميكا عىلىمدارىنىڭ كانديداتى دارەجەسىنە يە جانە اقپاراتتىق ساياسات پەن قوعاممەن بايلانىس سالاسىندا ۇلكەن تاجىريبەسى بار. بۇعان دەيىن ول بيلىك پەن قوعام اراسىنداعى كوممۋنيكاتسياعا جاۋاپتى قۇرىلىمداردا باسشىلىق قىزمەتتەردى اتقارعان.
شاۆكات ميرزيوەۆ 2016 جىلدان بەرى وزبەكستان پرەزيدەنتى قىزمەتىن اتقارىپ كەلەدى. ول يسلام كاريموۆتەن كەيىن بيلىككە كەلگەن. 2023 جىلى كونستيتۋتسياعا ەنگىزىلگەن وزگەرىستەر ناتيجەسىندە ونىڭ پرەزيدەنتتىك مەرزىمدەرى قايتا ەسەپتەلىپ، ەندى ول 2037 جىلعا دەيىن بيلىكتە قالا الادى.
