اقش ۆيتسە-پرەزيدەنتى دجەي دي ۆەنستىڭ وگايو شتاتىنداعى تسينتسينناتي قالاسىنا جاقىن ۋولنات-حيللز اۋدانىندا ورنالاسقان ۇيىنە شابۋىل جاسالعان، دەپ حابارلايدى "ادىرنا" ۇلتتىق پورتالى.
قازىر كۇدىكتى قولعا تۇسكەن. بۇل تۋرالى اقش قۇپيا قىزمەتى حابارلادى.
ۆەدومستۆو مالىمەتىنشە، وقيعا دۇيسەنبىگە قاراعان ءتۇنى، ءتۇن ورتاسىنان كەيىن كوپ ۇزاماي بولعان. قۇپيا قىزمەت اگەنتتەرى ءۇي ماڭىندا كەزەكشىلىك اتقارىپ جۇرگەن ساتتە ءتارتىپ بۇزۋشىنى جەدەل تۇردە توقتاتقان. كۇدىكتى رەتىندە 26 جاستاعى ۋيليام دەفۋر قاماۋعان الىنعان.
الدىن الا اقپاراتقا سايكەس، ەر ادام ءۇيدىڭ تەرەزەلەرىن بالعامەن سىندىرىپ، ىشكە كىرمەك بولعان. سونىمەن قاتار ول قۇپيا قىزمەتكە تيەسىلى اۆتوكولىككە دە زاقىم كەلتىرگەن.
دجەي دي ۆەنس بۇل كەزدە وتباسىمەن بىرگە ۆاشينگتوندا بولعانىن ايتتى. ول X الەۋمەتتىك جەلىسىندەگى پاراقشاسىندا وقيعاعا قاتىستى پىكىر ءبىلدىرىپ، جەدەل ارەكەت ەتكەن قۇپيا قىزمەت پەن تسينتسينناتي پوليتسياسىنا العىس ايتتى.
«ۇيىمىزگە جاسالعان شابۋىلعا بايلانىستى جىلى لەبىز بىلدىرگەندەردىڭ بارلىعىنا راحمەت. اقىلىنان اداسقان ادام تەرەزەلەردى بالعامەن سىندىرىپ، ۇيگە كىرۋگە تىرىسقان. باقىتىمىزعا وراي، ءبىز ول كەزدە ۇيدە بولعان جوقپىز»، — دەپ جازدى ۆەنس.
سونداي-اق ۆيتسە-پرەزيدەنت بۇقارالىق اقپارات قۇرالدارىن بالالاردىڭ قاۋىپسىزدىگىن ەسكەرۋگە شاقىرىپ، بۇلىنگەن ءۇيدىڭ سۋرەتتەرىن جاريالاۋعا ساقتىقپەن قاراۋدى ءوتىندى.
قازىرگى تاڭدا قۇپيا قىزمەت تسينتسينناتي پوليتسياسىمەن جانە اقش پروكۋراتۋراسىمەن بىرلەسىپ جۇمىس جۇرگىزىپ جاتىر. كۇدىكتىگە ناقتى قانداي ايىپ تاعىلاتىنى ءالى شەشىلمەگەن.
