باق: قىتاي جاڭا جويقىن قارۋ ءتۇرىن سىنادى

3734
Adyrna.kz Telegram

قىتايدا جىلدامدىعى دىبىس جىلدامدىعىنان بەس ەسە جوعارى بولاتىن گيپەردىبىستىق پلانەردەن زىمىران ۇشىردى، - دەپ حابارلايدى "ادىرنا" ءتىلشىسى Daily Mail باسىلىمىنا سىلتەمە جاساپ.

سىناقتار تۋرالى العاش رەت Financial Times حابارلادى. بەلگىلى بولعانداي، سىناقتار بيىل شىلدە ايىندا وڭتۇستىك قىتاي تەڭىزىنىڭ ۇستىندە بولعان. بولجام بويىنشا، سىناق قارۋىندا جويۋ نىساناسى بولماعان جانە سىناق كەزىندە قارۋدىڭ مۇمكىندىكتەرى تەكسەرىلگەن. ۇشاقتاردى جويۋعا ارنالعان باسقارىلاتىن «اۋا-اۋا» زىمىرانى بولۋى مۇمكىن پلانەردەن تەڭىز ۇستىندە بولىنگەن تاعى ءبىر نىسان بارىن انىقتاعان.

گازەتتىڭ حابارلاۋىنشا، اقش قورعانىس مينيسترلىگىنە قاراستى قورعانىس عىلىمي-زەرتتەۋ جوبالارى اگەنتتىگى (DARPA) قىتايدىڭ «فيزيكا زاڭدارىن اينالىپ وتەتىن» قارۋ جاساۋعا قالاي قول جەتكىزگەنىن تۇسىنۋگە تىرىسۋدا.

اق ءۇي ۇشىرۋ تۋرالى مالىمەتتەرگە تۇسىنىكتەمە بەرۋدەن باس تارتتى جانە تەك الاڭداۋشىلىقتارىنىڭ بار ەكەنىن قايتالادى. اقش-تاعى قىتاي ەلشىلىگى مۇنداي قارۋدىڭ سىناقتارى تۋرالى دەرەكتەردىڭ جوقتىعىن ايتتى.

بۇعان دەيىن Financial Times گازەتى قىتايدىڭ تامىز ايىندا يادرولىق قارۋ الىپ جۇرۋگە قابىلەتتى گيپەردىبىستىق زىمىراندى سىناقتان وتكىزگەنىن، بۇل اقش بارلاۋىن كۇتپەگەن جەردەن "ۇستاپ العانىن" جازعان. الايدا قىتاي سىرتقى ىستەر مينيسترلىگىنىڭ رەسمي وكىلى چجاو ليتسزيان قىتايدىڭ وسى جىلدىڭ تامىز ايىندا گيپەر دىبىستى زىمىراندى ەمەس، عارىش اپپاراتىن سىناعانىن ايتتى.

"ادىرنا" ۇلتتىق پورتالى

پىكىرلەر