پاۆلوداردا جاڭا جىل ءتۇنى پيروتەحنيكالىق بۇيىمداردى قولدانۋ سالدارىنان ەكى بالا مەن ەكى ەرەسەك ادام ءتۇرلى جاراقات الدى، دەپ حابارلايدى "ادىرنا" ۇلتتىق پورتالى.
پاۆلودار وبلىستىق جەدەل جاردەم ستانتسياسى باسشىسىنىڭ ورىنباسارى يرينا ميششەنكونىڭ ايتۋىنشا، پيروتەحنيكاعا بايلانىستى العاشقى شاقىرتۋ جاڭا جىل باستالعاننان كەيىن 28 مينۋت وتكەن سوڭ تۇسكەن. 16 جاستاعى قىز بالانىڭ كەۋدە تۇسىنان تەرميالىق كۇيىك الىپ، وبلىستىق بالالار اۋرۋحاناسىنا جەتكىزىلگەنى بەلگىلى بولدى. سول اۋرۋحاناعا قولىندا پەتاردا جارىلىپ كەتكەن 15 جاستاعى ءجاسوسپىرىم دە جەتكىزىلدى. ول ەكى كوزىنىڭ جانە سول قولىنىڭ تەرميالىق كۇيىگىن العان.
سونداي-اق، جاڭا جىل ءتۇنى كەنجەكول اۋىلىنان پاۆلودار قالالىق №1 اۋرۋحاناسىنا 33 جاستاعى ەر ادام جەتكىزىلگەن. ونىڭ قولىندا «بومبوچكا» جارىلىپ، كۇيىك پەن قولىنىڭ جىرتىلىپ-كەسىلگەن جاراقاتىن العان.
تاعى ءبىر جاعدايدا 18 جاستاعى جاس جىگىت ساتىپ العان فەيەرۆەركتىڭ تولىق اتىلعان-اتىلماعانىن تەكسەرمەك بولعان كەزدە كوزىنەن جاراقات العان.
يرينا ميششەنكو پيروتەحنيكالىق بۇيىمداردىڭ اسا قاۋىپتى ەكەنىن ەسكە سالدى. ونىڭ سوزىنشە، قاراپايىم سالعىرتتىق كورۋ قابىلەتىنەن نەمەسە قولدىڭ قوزعالىس مۇمكىندىگىنەن ايىرىلۋعا اكەلۋى مۇمكىن. ەڭ ءجيى كەزدەسەتىن قاتەلىكتەر – پەتاردانى تۇتاندىرعاننان كەيىن قولدا ۇستاپ تۇرۋ جانە ءساليۋتتىڭ ىسكە قوسىلعان-قوسىلماعانىن تەكسەرۋ. ادامنىڭ رەاكتسياسى جارىلىس جىلدامدىعىنان الدەقايدا باياۋ.
ماماندار جاراقات العان جاعدايدا كۇيىك ورنىن سالقىن اعىن سۋمەن شايىپ، تازا تاڭعىش سالىپ، دەرەۋ جەدەل جاردەم شاقىرۋ قاجەتتىگىن ەسكەرتەدى.
