پاۆلوداردا ۇزاق جىلدار بويى قازاقتىڭ كورنەكتى رەجيسسەرى ءارى اكتەرى شاكەن ايمانوۆتىڭ ەسىمىمەن اتالىپ كەلگەن كينوتەاتردىڭ ماڭدايشاسى وزگەرۋى جۇرتتىڭ اشۋىنا ءتيدى، دەپ حابارلايدى "ادىرنا" ءتىلشىسى قازاقپاراتقا سىلتەپ.
عيماراتقا جاڭا «G Cinema Park» برەندى ورناتىلعان. بۇل جاعداي جەرگىلىكتى تۇرعىنداردىڭ نارازىلىعىن تۋعىزدى.
«شاكەن ايمانوۆ كينوتەاترى» ۇزاق ۋاقىت بويى پاۆلودارداعى مادەني ورىنداردىڭ ءبىرى سانالدى. توقىراۋ كەزەڭىندە كينوتەاتر جۇمىسى توقتاپ، عيمارات ءبىراز ۋاقىت پايدالانىلماي تۇرعان. كەيىن 2000-جىلداردىڭ باسىندا ونى جەكە كاسىپكەر ساتىپ الىپ، قايتا جوندەۋدەن وتكىزىپ، زاماناۋي كينوتەاتر رەتىندە ىسكە قوسقان. نىسان 20 جىلدان استام ۋاقىت بويى «ش.ايمانوۆ كينوتەاترى» اتاۋىمەن جۇمىس ىستەپ كەلگەن.
قازاقپارات حابارلاۋىنشا، عيمارات «G Cinema Park» كينوتەاترلار جەلىسىنە جالعا بەرىلگەن. جاڭا جالعا الۋشى نىساننىڭ ماڭدايشاسىنا ءوز برەندىن ورنالاستىرىپ، شاكەن ايمانوۆتىڭ ەسىمىن الىپ تاستاعان. بۇل شەشىم جەرگىلىكتى قوعام وكىلدەرىنىڭ سىنىنا ۇشىرادى. تۇرعىندار مەن زيالى قاۋىم وكىلدەرى ۇلتتىق ونەرگە ەڭبەگى سىڭگەن تۇلعانىڭ ەسىمىن مادەني نىساننان الىپ تاستاۋعا قارسىلىق ءبىلدىرىپ، اتاۋدى ساقتاپ قالۋدى سۇراپ وتىر.
سونىمەن قاتار عيمارات يەسى – «پرومەت LTD» كومپانياسىنىڭ باسشىسى جەڭىس قۇنانباەۆ كينوتەاتردىڭ بۇرىنعى اتاۋى زاڭدى تۇردە تىركەلمەگەنىن حابارلادى. كاسىپكەردىڭ ايتۋىنشا، شاكەن ايمانوۆتىڭ ەسىمىن ءبىرجولا الىپ تاستاۋ جوسپارلانباعان. ماڭدايشاداعى بۇرىنعى كونسترۋكتسيانىڭ توزۋىنا بايلانىستى ونى جاڭارتۋ قاجەت بولعان.
«جاڭا ديزايندا جاسالىپ، بيىلعى قىركۇيەك ايىنىڭ سوڭىنا دەيىن “G Cinema Park” اتاۋىنىڭ جانىنا “شاكەن ايمانوۆ” دەگەن ۇلكەن جازۋ قويىلادى. بۇعان قوسا كينوتەاتر ىشىندە ۇلى كينورەجيسسەرگە ارنالعان بۇرىش اشىلادى»، – دەدى جەڭىس قۇنانباەۆ.
قازىرگى تاڭدا پاۆلودارداعى «G Cinema Park» كينوتەاترى تولىققاندى جۇمىسىن ءالى باستاعان جوق. كومپانيا وكىلدەرى نىسان رەسمي تۇردە ىسكە قوسىلعاننان كەيىن عانا ماسەلە بويىنشا تۇسىنىكتەمە بەرەتىنىن جەتكىزدى.
