قازاقستاندا جاڭا ويىن ايماقتارىن اشۋ جوسپارلانىپ وتىر. ولار ماڭعىستاۋ، الماتى، شىعىس قازاقستان جانە جەتىسۋ وبلىستارىندا پايدا بولۋى مۇمكىن، دەپ حابارلايدى "ادىرنا" ۇلتتىق پورتالى تۋريزم جانە سپورت مينيسترىنە سىلتەپ.
قابىلدانعان زاڭعا سايكەس، بۋراباي مەن قاپشاعايداعى قولدانىستاعى ويىن ايماقتارىنان بولەك، ماڭعىستاۋ وبلىسىنداعى كاسپي تەڭىزىنىڭ جاعالاۋىندا، جەتىسۋ وبلىسىنىڭ پانفيلوۆ اۋدانىنداعى الاكول كولىنىڭ ماڭىندا، الماتى وبلىسىنىڭ تالعار اۋدانىندا، شىعىس قازاقستان وبلىسىنداعى مارقاكول اۋماعى مەن زايسان اۋدانىندا كازينو ورنالاستىرۋ كوزدەلىپ وتىر. الايدا ناقتى قاي مەكەندە ورنالاساتىنى ازىرگە بەلگىسىز.
ءمينيستردىڭ ايتۋىنشا، ويىن ايماقتارى ورنالاساتىن ناقتى جەر تەلىمدەرىن جەرگىلىكتى اتقارۋشى ورگاندار انىقتايدى. بۇل شەشىم ينفراقۇرىلىمنىڭ دامۋى مەن وزگە دە فاكتورلارعا بايلانىستى قابىلدانادى. ەربول مىرزابوسىنوۆ ويىن ايماقتارىن دامىتۋ ءتۋريزمدى ىلگەرىلەتۋدىڭ ءبىر تەتىگى رەتىندە قاراستىرىلىپ وتىرعانىن جانە مۇنداي تاجىريبە كوپتەگەن ەلدەردە قولدانىلاتىنىن اتاپ ءوتتى.
سونداي-اق مينيستر ءاربىر جاڭا كازينو جىلىنا بيۋدجەتكە شامامەن 2–3 ميلليارد تەڭگە كولەمىندە سالىق ءتۇسىرىپ، 500-گە جۋىق جۇمىس ورنىن اشۋعا مۇمكىندىك بەرەتىنىن ايتتى. ول ويىن بيزنەسىنە سالىقتىق جەڭىلدىكتەر قاراستىرىلىپ جاتىر دەگەن اقپاراتتى جوققا شىعارىپ، كازينولار ءاربىر ويىن ۇستەلى ءۇشىن بەلگىلەنگەن تارتىپپەن سالىق تولەيتىنىن جەتكىزدى.
