ءبيبىسارا اساۋباەۆا شاحماتتان ءۇش دۇركىن الەم چەمپيونى اتاندى. تۋرنير دوحا قالاسىندا ءوتتى، دەپ حابارلايدى «ادىرنا» ءتىلشىسى.
فينالدىق پارتيادا قازاقستاندىق سپورتشى ۋكراينا وكىلى اننا مۋزىچۋكءتى جەڭدى. ال جارتىلاي فينالدا ءبيبىسارا قىتاي شاحماتشىسى چجۋ تسزينەرءدى ءۇش پارتيانى قاتارىنان ۇتىپ، سەنىمدى تۇردە فينالعا شىقتى. مۋزىچۋك ءوز كەزەگىندە نيدەرلاند وكىلى ەلين رۋبەرستى جەڭىپ، فينالعا جولداما العان.
بليتس بويىنشا الەم چەمپيوناتىنىڭ جالپى جۇلدە قورى 1 ميلليون ەۋرودان استى. 21 جاستاعى اساۋباەۆا بۇعان دەيىن 2021 جانە 2022 جىلدارى دا بليتستەن الەم چەمپيونى اتانعان، سونداي-اق راپيدتەن الەم چەمپيوناتىنىڭ كۇمىس جۇلدەگەرى بولعان. 2025 جىلى قازاقستاندىق شاحماتشى FIDE Grand Swiss تۋرنيرىندە قولا مەدال يەلەنىپ، حالىقارالىق گروسسمەيستەر اتاعىن الدى.
مەملەكەت باسشىسى قاسىم-جومارت توقاەۆ قازاقستاندىق سپورتشىنى شاحماتتىڭ بليتس تۇرىنەن الەم چەمپيوناتىنداعى جەڭىسىمەن قۇتتىقتادى.
ء«بيبىسارا اساۋباەۆا قازاقستاننان شىققان بليتستەن ءۇش دۇركىن الەم چەمپيونى جانە مايتالمان شەبەر رەتىندە دۇنيەجۇزىلىك شاحمات تاريحىنا ەندى.
قازاقستاندىق شاحمات قاۋىمداستىعى مەملەكەتىمىزدىڭ كوك تۋىن جاھاندىق ارەنادا بيىك جەلبىرەتكەن وتانداسىمىزدىڭ جەڭىسىن ماقتان تۇتادى.
ءبيبىسارا اساۋباەۆانىڭ حالىقارالىق جارىستارداعى ايتۋلى جەتىستىكتەرى مەن ەل شاحماتىن دامىتۋعا قوسقان ەلەۋلى ۇلەسى ءۇشىن ونى ءىى دارەجەلى «بارىس» وردەنىمەن ماراپاتتاۋ تۋرالى شەشىم قابىلدادىم»،-دەلىنگەن قۇتتىقتاۋدا.
