Ukrainada soǧys qimyldaryna qatysyp jürgen Äzerbaijan azamattary ömır boiyna bas bostandyǧynan aiyryluy mümkın. Mūndai eskertudı eldıŋ Bas prokuraturasy jasady, dep habarlaidy «Adyrna» tılşısı.
29 jeltoqsanda jariialanǧan habarlamada keibır äzerbaijandyqtyŋ Resei men Ukraina arasyndaǧy soǧys qimyldaryna, sondai-aq özge de qaruly qaqtyǧystarǧa qatysyp jürgenı aitylǧan. Bas prokuraturanyŋ mälımetınşe, Äzerbaijan zaŋnamasyna säikes, Ukrainadaǧy soǧysqa qai tarapta bolmasyn qatysu — qylmys bolyp sanalady jäne ol üşın ömır boiyna türmege qamau jazasy közdelgen.
«Resei men Ukraina arasyndaǧy äskeri operasiialarǧa qatysqan keibır azamattarymyzdyŋ qaza tapqany, auyr jaralanǧany nemese tūtqynǧa tüskenı turaly aqparattar bızdı alaŋdatady», — delıngen habarlamada.
Bas prokuratura Äzerbaijan Qylmystyq kodeksındegı «Jaldamalylyq» turaly bapty eske saldy. Būl bap boiynşa jaza 8 jylǧa bas bostandyǧynan aiyrudan bastap ömır boiyna türmege qamauǧa deiın jetuı mümkın. Qazırgı taŋda osy bap aiasynda bırqatar azamatqa qatysty qylmystyq ıster qozǧalyp, tergeu jürgızılıp jatyr. Alaida olardyŋ naqty Ukrainada soǧysqany nemese sany qanşa ekenı naqtylanbady.
Vedomstvo azamattardy zaŋsyz ündeulerge ermeuge, qyraǧylyq saqtauǧa jäne memleket zaŋdaryn qūrmetteuge şaqyrdy.
Eske salaiyq, 2023 jyldyŋ mamyr aiynda Bakudegı Ukraina elşılıgınıŋ qorşauynda Ukraina Qaruly küşterı jaǧynda soǧysyp qaza tapqan äzerbaijan azamattaryna arnalǧan «Estelık qabyrǧasy» aşylǧan. Onda 26 adamnyŋ esımı jazylǧan.
Al 2025 jyldyŋ säuırınde Media.az portaly Ukrainada soǧys barysynda ekı äzerbaijan azamaty — Sanan Mohsumov pen Gusein İsaevtyŋ maidannyŋ ekı jaǧynda qaza tapqanyn jazǧan.
