Özbekstannyŋ Andijan oblysynda Resei äskerınıŋ sapynda soǧysqan azamatqa qatysty sot ükım şyqty. Būl turaly Uznews.uz jazdy, dep habarlaidy «Adyrna» tılşısı.
Is materialdaryna säikes, 2022 jyldyŋ jeltoqsanynda 25 jastaǧy İ.H. tabys tabu maqsatynda Reseige baryp, kurer bolyp jūmysqa ornalasqan. 2023 jyldyŋ qaŋtarynda ol ūstalyp, esırtkı qūraldarynyŋ zaŋsyz ainalymy üşın 8 jylǧa bas bostandyǧynan aiyrylǧan.
2024 jyldyŋ tamyzynda koloniiada otyrǧan kezınde İ.H. Resei Qaruly küşterımen kelısımşart jasasyp, Ukraina aumaǧyndaǧy ūrys qimyldaryna jıberılgen. Donesk maŋyndaǧy şaiqastar barysynda ol auyr jaraqat alǧan. Keiın äskeri gospitaldarda ūzaq em qabyldap, 2025 jyldyŋ qyrküiegınde Özbekstanǧa oralǧan. Elge kelgen soŋ qūqyq qorǧau organdary ony qaita ūstaǧan.
Andijan oblysynyŋ Jalakuuduk audandyq qylmystyq ıster jönındegı soty İ.H.-ny Özbekstan Qylmystyq kodeksınıŋ 154-babynyŋ 1-bölıgı («Jaldamalylyq») boiynşa kınälı dep tanyp, 5 jylǧa bas bostandyǧynan aiyru jazasyn taǧaiyndaǧan. Alaida sot aiyptaluşynyŋ jasyn, Özbekstanda būryn sottalmaǧanyn, kınäsın moiyndauyn, sondai-aq alǧan jaraqattarynyŋ saldarynan densaulyǧynyŋ auyr jaǧdaiyn eskerıp, jazany ekı jyldyq synaq merzımımen şartty jazaǧa almastyrǧan.
Aita keteiık, qaraşada Özbekstannyŋ memlekettık qauıpsızdık qyzmetı 2022 jyldan berı el azamattarynyŋ şeteldegı qaruly qaqtyǧystarǧa qatysu faktılerı boiynşa 338 qylmystyq ıs qozǧalǧanyn mälımdegen edı.
