مەملەكەت باسشىسى قاسىم-جومارت توقاەۆ الماتى وبلىستىق №1 بالالار ءۇيىءنىڭ تاربيەلەنۋشىلەرىن قوناەۆ قالاسىنداعى جاڭا عيماراتقا كوشىرۋدى توقتاتۋدى تاپسىردى. بۇل تۋرالى پرەزيدەنتتىڭ ءباسپاسوز حاتشىسى رۋسلان جەلدىباي ايتتى، دەپ حابارلايدى «ادىرنا» ءتىلشىسى.
«باعاناشىل» بالالار ءۇيىنىڭ تاربيەلەنۋشىلەرىن الماتىدان قوناەۆ قالاسىنا كوشىرۋگە بايلانىستى جاعدايمەن تانىسقان قاسىم-جومارت توقاەۆ الماتى قالاسىنىڭ اكىمى دارحان ساتىبالدىعا وقۋشىلاردىڭ وڭتۇستىك استانادا ءبىلىم الۋىن جالعاستىرۋ ءۇشىن بالالار ۇيىنە جوندەۋ جۇمىستارىن جۇرگىزۋدى جانە اتالعان نىساندى قالانىڭ بالانسىنا الۋدى تاپسىردى. مەملەكەت باسشىسىنىڭ تاپسىرماسىنا سايكەس، بالالار ءۇيى كوشىرىلمەيدى»،—دەلىنگەن حابارلامادا.
اتالعان جاعدايعا بايلانىستى پرەزيدەنت اكىمشىلىگى قىزمەتتىك تەكسەرىس جۇرگىزەدى.
رۋسلان جەلدىباي اتا-اناسىنىڭ قامقورلىعىنسىز قالعان بالالاردىڭ زاڭ شەڭبەرىندەگى بارلىق قۇقىعى تولىق ساقتالاتىنىن اتاپ ءوتتى.
ايتا كەتەيىك، بۇگىن، 21 شىلدەدە پوليتسيا قىزمەتكەرلەرى بالالاردى قوناەۆ قالاسىنداعى جاڭا بالالار ۇيىنە كوشىرۋ ءۇشىن كەلگەن بولاتىن. الايدا تاربيەلەنۋشىلەر كولىككە مىنبەي، شۋ شىعاردى. ولار بۇل شەشىممەن كەلىسپەيتىندەرىن ايتىپ، نارازىلىقتارىن ءبىلدىردى.
باعاناشىلداعى بالالار ءۇيىن كوشىرۋ تۋرالى باستاما ناۋرىز ايىندا باستالعان بولاتىن. وبلىستىق ءبىلىم باسقارماسى مەكەمەنىڭ ىرگەتاسى 1963 جىلى قالانعانىن، سودان بەرى كۇردەلى جوندەۋدەن وتپەگەنىن ايتقان. ماماندار بالالاردى قاۋىپسىز جەرگە كوشىرۋ ماسەلەسى تۋىنداعاندىقتان، جەكە ينۆەستوردىڭ قارجىسىنا قوناەۆتا جاڭا بالالار ءۇيى بوي كوتەرگەنىن جەتكىزگەن. الايدا قوعام بەلسەندىلەرى مەن مەكەمەگە قولداۋ كورسەتىپ جۇرگەن دەمەۋشىلەردىڭ قارسىلىعىنان كەيىن جەرگىلىكتى بيلىك «كوشىرمەيمىز» دەپ ۋادە بەرگەن ەدى. الايدا كەيىننەن تاربيەلەنۋشىلەردىڭ قوناەۆقا كوشەتىنى بەلگىلى بولدى.
