تاجىكستاننىڭ حاتلون وبلىسىنداعى داڭعارا – سارباند اۆتوجولىندا ۇيلەنۋ تويىنىڭ كورتەجى قاتىسقان اۋىر جول-كولىك وقيعاسى ورىن الدى. قايعىلى اپات 27 جەلتوقسان كۇنى تىركەلگەن، دەپ حابارلايدى “ادىرنا”.
الدىن الا مالىمەتتەرگە سايكەس، كورتەج ۆوسە اۋدانىنان جالوليددين بالحي اۋدانىنا قالىڭدىقتى الىپ كەتۋ ءۇشىن جولعا شىققان. جول ۇستىندە كولونناداعى ەلەكتروموبيل قارسى باعىتتا كەلە جاتقان Lexus كولىگىمەن سوقتىعىسقان.
سارباند ورتالىق اۋداندىق اۋرۋحاناسى باس دارىگەرىنىڭ ورىنباسارى داۆرونبەك مۋسوەۆتىڭ «ازيا-پليۋس» باسىلىمىنا بەرگەن اقپاراتىنا سۇيەنسەك، جول اپاتى سالدارىنان كۇيەۋ جىگىتتىڭ ءتورت جاقىن تۋىسى وقيعا ورنىندا قازا تاپقان.
قازا بولعانداردىڭ قاتارىندا 17 جاستاعى سۋبحوني سافاري، 42 جاستاعى نۋر شامسيددينوۆ، 15 جاستاعى حافيزا شامسيددينوۆا جانە ەلەكتروموبيل جۇرگىزۋشىسى بار. مارقۇمداردىڭ بارلىعى ۆوسە اۋدانىنىڭ تۇرعىندارى ەكەنى حابارلاندى.
سونىمەن قاتار Lexus كولىگىندەگى ءتورت جولاۋشى ءتۇرلى دارەجەدەگى اۋىر جاراقات الىپ، مەديتسينالىق مەكەمەگە جەتكىزىلگەن. دارىگەرلەر ولاردىڭ جاعدايىن باقىلاۋدا ۇستاپ وتىر.
قازىرگى تاڭدا اتالعان جول-كولىك وقيعاسىنىڭ ناقتى سەبەپتەرى انىقتالۋدا. قۇزىرلى ورگاندار تەرگەۋ جۇمىستارىن باستاپ، جول اپاتىنا قاتىستى بارلىق ءمان-جايدى تەكسەرىپ جاتىر.
