الماتى قالاسىنىڭ جۇكتەمەسىن ازايتۋ ماقساتىندا مەگاپوليس ماڭىنان جاڭا وقۋ كامپۋستارىن سالۋ جوسپارلانىپ وتىر، دەپ حابارلايدى "ادىرنا" ۇلتتىق پورتالى.
بۇل تۋرالى «الماتىباسجوسپار» عىلىمي-زەرتتەۋ ينستيتۋتىنىڭ باس ديرەكتورى اسحات سادۋوۆ قوعامدىق تىڭداۋ كەزىندە مالىمدەدى.
قوعامدىق تالقىلاۋ بارىسىندا قالا سىرتىندا تۇراتىن ستۋدەنتتەر ۋنيۆەرسيتەتكە جەتۋ ءۇشىن بىرنەشە ساعات جول جۇرەتىنىن ايتىپ، وقۋ ورىندارىن قالا شەتىنە كوشىرۋ مۇمكىندىگىن كوتەردى.
«مەن وقۋعا جەتۋ ءۇشىن ءۇش جارىم ساعات ۋاقىتىمدى جۇمسايمىن. ۋنيۆەرسيتەتتەردى قالا شەتىنەن سالۋعا بولا ما؟» – دەگەن ساۋال قويىلدى.
اسحات سادۋوۆ بۇل ماسەلەنى شەشۋ ءۇشىن الماتى ماڭىندا «عىلىم قالاسىن» سالۋ جوسپارى بار ەكەنىن ەسكە سالدى. ونىڭ ايتۋىنشا، باكاد بويىندا 500 گەكتار اۋماقتى قامتيتىن ءىرى جوبا ازىرلەنىپ جاتىر.
بۇل قادام الماتىداعى قولدانىستاعى ۋنيۆەرسيتەتتەردىڭ شامادان تىس جۇكتەمەسىن ازايتۋعا باعىتتالعان.
"ەكى جوبا دا ۇكىمەتتىڭ باقىلاۋىندا. عىلىم قالاسى مەن الاتاۋ اۋماعىندا كوپتەگەن كامپۋستار جوسپارلانىپ وتىر. بۇل ستۋدەنتتەر اعىنىن ءتيىمدى تاراتۋعا مۇمكىندىك بەرەدى", – دەدى «الماتىباسجوسپار» ديرەكتورى.
الايدا جوبالاردىڭ ناقتى ىسكە اسۋ مەرزىمى مەن قاي ۋنيۆەرسيتەتتەردىڭ كوشىرىلەتىنى ازىرگە بەلگىسىز.
