Prezident Qasym-Jomart Toqaev biylǧy qorytyndy boiynşa elordanyŋ öŋırlık jalpy önım kölemı 34 milliard dollar bolatynyn mälımdedı. Būl turaly ol Astanany damytu jönındegı keŋeste aitty, dep habarlaidy «Adyrna» tılşısı.
«Qazır Astana qarqyndy ösıp keledı. Türlı baǧyt boiynşa belsendı jūmys ıstelıp jatyr. Soŋǧy 11 aida qysqa merzımge arnalǧan ekonomikalyq indikator 118,6 paiyzǧa jettı. İnvestisiia, qūrylys, şaǧyn jäne orta biznes salasyndaǧy körsetkışter boiynşa Astana aldyŋǧy orynda tūr. Elordanyŋ köş basynda boluy – zaŋdylyq. Biyl elordadaǧy tūrǧyn üi qūrylysy 5 millionǧa juyq şarşy metrdı qūraidy. Būl elımızde paidalanuǧa berılgen baspananyŋ törtten bırı jäne Ortalyq Aziia aimaǧyndaǧy basqa astanalardyŋ körsetkışterınen bırneşe ese artyq.
Öŋdeu önerkäsıbı önımınıŋ kölemı 2025 jyldyŋ 11 aiynda 2,8 trillion teŋgege jetıp, 7,2 paiyz östı. Iаǧni 6 milliard dollar şamasynda»,- dedı ol.
Prezident sauda kölemınıŋ de artqanyn jetkızdı.
«Biylǧy 11 aida sauda kölemı 10,8 trillion teŋgeden asyp, 8,4 paiyz ösım körsetke. Būl – şamamen 22,5 milliard dollar. Maǧan berılgen mälımet boiynşa, qala biudjetıne 4,3 trillion teŋge salyq tüsken. Mūny qomaqty qarjy deuge bolady. Astananyŋ 2024 jylǧy öŋırlık jalpy önım kölemı 15 trillion teŋgeden säl asty. Būl – 32 milliard dollar. Biylǧy qorytyndy boiynşa 34, tıptı, 35 milliard dollar (17 trillion teŋge nemese odan da joǧary) bolady dep kütılude. Al qaladaǧy halyqtyŋ resmi sany 1,6 million adamǧa jetken»,-dedı Toqaev.
Memleket basşysy Astana äkımıne Smart City jobasyn tezdetıp aiaqtaudy tapsyrdy.
«Būǧan deiın menıŋ tapsyrmam boiynşa Astanada Smart City jobasy qolǧa alyndy. Jaqyn arada Jedel basqaru ortalyǧy ıske qosylady. Qaladaǧy beinekameralardyŋ jūmysy jäne basqa da qyzmetter osy ortalyqtan basqarylady. Būl jüie türlı qauıp-qaterge der kezınde nazar audaruǧa jäne keleŋsız oqiǧalardyŋ aldyn aluǧa mümkındık beredı.
Qazır platformany ıske qosu üşın Derekterdı taldau ortalyǧy salynyp jatyr. Osy sifrlyq infraqūrylymdy qūqyq qorǧau organdary da qoldana alady. Sol arqyly qalanyŋ qauıpsızdıgın küşeituge mümkındık tuady. «Zaŋ jäne tärtıp» qaǧidaty ıs jüzınde jūmys ısteuge tiıs. Astana äkımıne osy şaruany tezdetıp aiaqtaudy tapsyramyn. Elımızdegı basqa qalalar da osyndai platformany engızuge tiıs. Būl jūmysty Jasandy intellekt jäne sifrlyq damu ministrlıgı üilestıruı kerek»,-dep tolyqtyrdy ol.
