قازاقستاننىڭ پرەمەر-ءمينيسترى ولجاس بەكتەنوۆ بارلىق اۆتوجول جوبالارىنىڭ جۇزەگە اسىرىلۋىن تەكسەرۋگە 1 قازانعا دەيىن ۋاقىت بەردى. بۇل تۋرالى ۇكىمەتتىڭ ءباسپاسوز قىزمەتى جاريالادى، دەپ حابارلايدى “ادىرنا”.
«جوعارىدا اتالعان زاڭبۇزۋشىلىقتاردى ەسكەرە وتىرىپ، كولىك مينيسترلىگى مەن ۇلتتىق ساپا ورتالىعىنا بارلىق اۆتوجول جوبالارىنىڭ جۇزەگە اسىرىلۋىن 1 قازانعا دەيىن تەكسەرۋدى تاپسىرامىن. ناتيجەسىندە كىنالىلەردى جاۋاپكەرشىلىككە تارتۋ بويىنشا ۇسىنىستار ازىرلەنۋى ءتيىس. كولىك جانە قارجى مينيسترلىكتەرىنە ۇلتتىق ساپا ورتالىعىنىڭ جۇمىسىن كۇشەيتۋ جونىندە شەشىمدەر دايىنداۋدى تاپسىرامىن»، — دەدى ولجاس بەكتەنوۆ پرەزيدەنتتىڭ اۆتوجولداردىڭ ساپاسىن ارتتىرۋ جونىندەگى تاپسىرمالارىن ورىنداۋ بارىسىنا ارنالعان كەڭەستە.
كەڭەستە جول سالاسىنىڭ قازىرگى جاعدايى مەن دامۋ جوسپارى قارالدى. پرەزيدەنتتىڭ كولىك ينفراقۇرىلىمىن جاڭعىرتۋعا قاتىستى تاپسىرمالارى نەگىزگە الىندى.
كولىك ۆيتسە-ءمينيسترى ماقسات قالياقپاروۆ پەن «قازجولعزي» اق پرەزيدەنتى ارمان الىباەۆا بايانداما جاسادى. كولىك مينيسترلىگىنىڭ دەرەكتەرى بويىنشا، ەلىمىزدەگى جول جەلىسىنىڭ جالپى ۇزىندىعى – 185 مىڭ كم، ونىڭ ىشىندە 25 مىڭ كم – رەسپۋبليكالىق ماڭىزى بار جولدار، 70 مىڭ كم – جەرگىلىكتى جولدار جانە 90 مىڭ كم – ەلدى مەكەن كوشەلەرى. 2025 جىلى 13 مىڭ كم جول جوندەلەدى دەپ جوسپارلانعان: ونىڭ 2 مىڭ كم-دەن استامى – رەسپۋبليكالىق جولداردى قايتا جاڭارتۋ، 6,6 مىڭ كم – وبلىس ورتالىقتارى اراسىنداعى جولداردى جوندەۋ، 4,1 مىڭ كم – جەرگىلىكتى جەلى.
2025 جىلدىڭ قورىتىندىسى بويىنشا رەسپۋبليكالىق ماڭىزى بار جولداردىڭ نورماتيۆتىك جاعدايىن 94%-عا، جەرگىلىكتى جولداردى 91%-عا جەتكىزۋ كوزدەلىپ وتىر.
زاڭنامالىق دەڭگەيدە بىرقاتار وزگەرىستەر ەنگىزىلدى:
- ۇلتتىق ساپا ورتالىعىنىڭ ەسكەرتۋلەرىن جويماي، جول نىساندارىن پايدالانۋعا قابىلداۋعا تىيىم سالىندى;
- 2023 جىلدان باستاپ ورتاشا جوندەۋ جوبالارى مىندەتتى تۇردە ۆەدومستۆولىق ساراپتامادان ءوتۋى ءتيىس.
2025 جىلدىڭ العاشقى جەتى ايىنىڭ قورىتىندىسى بويىنشا:
- ساپاسىز قۇرىلىس ماتەريالدارىنىڭ جانە جول اقاۋلارىنىڭ ۇلەسى 2%-عا ازايدى;
- گراۆي توسەلگەن جەرگىلىكتى جولداردى اسفالتبەتون جابىنىنا اۋىستىرۋ 14%-عا ارتتى;
- جوبالىق شەشىمدەردى وڭتايلاندىرۋ ارقىلى 1 ملرد تەڭگەدەن استام قاراجات ۇنەمدەلدى;
- جەرگىلىكتى جولداردىڭ 50%-ى دياگنوستيكامەن قامتىلدى;
- 384 اسفالت-بەتون زاۋىتى كەشەندى تەكسەرۋدەن ءوتتى;
- «كىلتپەن تاپسىرۋ» فورماتىنداعى كەلىسىمشارتتار مەن جوبالىق قۇجاتتاردى الدىن الا ساراپتاۋ ەنگىزىلدى.
«قازجولعزي» پرەزيدەنتى ارمان الىباەۆا جول سالاسىنا تسيفرلىق تەحنولوگيالاردى ەنگىزۋ بويىنشا بايانداما جاسادى. سوڭعى بەس جىلدا ينستيتۋت جول قۇرىلىسىن جەتىلدىرۋگە باعىتتالعان 20-دان استام عىلىمي زەرتتەۋ جۇرگىزگەن. قازىرگى تاڭدا بىرنەشە تسيفرلىق جوبا جۇزەگە اسىرىلۋدا.
اتقارىلىپ جاتقان نەگىزگى جوبالار مەن باستامالار:
- Superpave تەحنولوگياسى – جول جامىلعىسىن كليمات پەن كولىك اعىنىنا بەيىمدەي وتىرىپ ۇزاق مەرزىمدى ەتۋگە مۇمكىندىك بەرەدى;
- Jolshy پلاتفورماسى – 2 مىڭنان استام ماماندى بىرىكتىرگەن، كادرلىق وزگەرىستەر مەن بىلىكتىلىك دەڭگەيىن باقىلاۋعا ارنالعان بازا;
- جول-كولىك وقيعالارىن تالداۋ پورتالى – جولداعى قاۋىپسىزدىكتى ارتتىرۋعا باعىتتالعان جاڭا باستاما.
ولجاس بەكتەنوۆ 2030 جىلعا دەيىن 4 مىڭ كم جولدى قايتا جاڭارتۋ قاجەت ەكەنىن اتاپ ءوتتى. بيىل اياقتالاتىن ماڭىزدى جوبالارمەن قاتار، جوبالىق قۇجاتتاماسى دايىن جاڭا باعىتتاردى (اقتوبە–ۇلعايسىن، قاراعاندى–جەزقازعان، اتىراۋ–دوسسور، سارىاعاش، پەتروپاۆل، رۋدنىي، قىزىلوردا اينالما جولدارى) ىسكە قوسۋ تاپسىرىلدى. سونداي-اق، 2,5 مىڭ كم جول ورتاشا جوندەۋمەن قامتىلۋى ءتيىس.
كولىك جانە قارجى مينيسترلىكتەرىنە، «قازاۆتوجول» كومپانياسىنا قارجىلاندىرۋ مەن مەردىگەرلەردى انىقتاۋ، ال كولىك جانە قۇرىلىس مينيسترلىكتەرىنە — جوبالىق ساراپتامانى قۇرىلىس-مونتاج جۇمىستارى كەزىندە پاراللەل جۇرگىزۋ تەتىگىن ازىرلەۋ تاپسىرىلدى.
انىقتالعان وزەكتى ماسەلەلەر:
- جەتىسۋ، الماتى وبلىستارىندا ساپا ورتالىعىنىڭ ەسكەرتۋلەرىنە قاراماستان، نىساندار قابىلدانۋدا;
- پاۆلودار تراسساسىندا بەتون جامىلعىسىنىڭ كوتەرىلۋى تىركەلگەن;
- سولتۇستىك قازاقستان وبلىسىندا الىنعان سىنامالاردىڭ 43%-ى ستاندارتقا ساي كەلمەيدى;
- اتىراۋ مەن تۇركىستان وبلىستارىندا تۇرعىندار جول ساپاسىنا ءجيى شاعىمدانادى;
- قاراجات يگەرۋ قارقىنى تومەن: اباي وبلىسى — 42%، اقتوبە — 52%، اقمولا — 56%.
پرەمەر-مينيستر ساپاسىز جۇمىس ءۇشىن مەردىگەرلەردىڭ جاۋاپكەرشىلىگىن ارتتىرۋدى، سونداي-اق، بولىنگەن بيۋدجەت قاراجاتىن ءتيىمدى يگەرۋدى تاپسىردى.
