«سامۇرىق-قازىنا» ۇلتتىق ءال-اۋقات قورى Qazaq Air اۋە كومپانياسىنداعى باقىلاۋ پاكەتىن ساتۋ جونىندەگى مامىلەنى اياقتادى، دەپ حابارلايدى "ادىرنا" ۇلتتىق پورتالى Tengri Travel-گە سىلتەپ.
قۇجاتقا سايكەس، 2025 جىلعى 6 مامىردا قور Qazaq Air اكتسيونەرلىك قوعامىنىڭ 51 پايىز اكتسياسىن ساتۋ-ساتىپ الۋ مامىلەسىن تۇپكىلىكتى جاپتى. ونىڭ ىشىندە 49 پايىزى Central Asia Aviation Holdings Limited جەكە كومپانياسىنا، ال 2 پايىزى Kazasía Holdings Limited جاۋاپكەرشىلىگى شەكتەۋلى سەرىكتەستىگىنە بەرىلگەن.
«اۋە كومپانياسىنداعى 51 پايىز ۇلەستى ىسكە اسىرۋ قۇنى 1,020 ملرد تەڭگەنى قۇرادى»، – دەلىنگەن «سامۇرىق-قازىنا» قورىنىڭ رەسمي قۇجاتىندا.
مامىلە ناتيجەسىندە قور Qazaq Air كومپانياسىنا باقىلاۋ جۇرگىزۋ قۇقىعىنان ايىرىلدى. دەگەنمەن «سامۇرىق-قازىنا» اۋە تاسىمالداۋشىنىڭ قىزمەتىنە ەلەۋلى ىقپالىن ساقتاپ قالدى جانە ينۆەستيتسيانى قاۋىمداستىرىلعان كومپانيا رەتىندە ءادىل قۇنى بويىنشا مويىندادى.
ايتا كەتەيىك، وتكەن جىلدىڭ جەلتوقسان ايىندا Central Asia Aviation Holdings Limited كونسورتسيۋمى (ۆەتنامنىڭ Sovico Group قۇرامىنا كىرەدى) قازاقستاندىق Qazaq Air اۋە كومپانياسىن ساتىپ العان بولاتىن.
