ۋكراينا پرەزيدەنتى ۆلاديمير زەلەنسكي 18 تامىزدا ۆاشينگتوندا اقش پرەزيدەنتى دونالد ترامپپەن كەزدەسەدى. بۇل تۋرالى ول ءوز Telegram-كانالىندا جازدى، دەپ حابارلايدى «ادىرنا» ءتىلشىسى.
ۋكراينا باسشىسىنىڭ ايتۋىنشا، ەكى ەل پرەزيدەنتى سوعىستى توقتاتۋ ماسەلەسىن ەگجەي-تەگجەيلى تالقىلايتىن بولادى.
زەلەنسكي الدىمەن ترامپپەن جەكە سويلەسكەنىن، كەيىن ەۋروپا ليدەرلەرىنىڭ اڭگىمەگە قوسىلعانىن اتاپ ءوتتى. اڭگىمەلەسۋ ءبىر جارىم ساعاتتان استام ۋاقىتقا سوزىلعان.
اقش پرەزيدەنتى ترامپ الياسكادا رەسەي پرەزيدەنتى ۆلاديمير پۋتينمەن كەزدەسكەنىن جانە نەگىزگى تالقىلانعان ماسەلەلەردى زەلەنسكيگە حابارلاعان.
زەلەنسكي ۋكراينا، اقش جانە رەسەي ليدەرلەرىنىڭ ۇشجاقتى ءسامميتىن وتكىزۋ جونىندەگى ترامپتىڭ ۇسىنىسىن قولدادى. ول كەلىسسوزدەردىڭ بارلىق كەزەڭىنە ەۋروپالىق ارىپتەستەردىڭ قاتىسۋىنىڭ ماڭىزدى ەكەنىن اتاپ ءوتتى.
