Абай облысында мыңға жуық құрылтайшысы бар “К-Дорстрой” компаниясына тиесілі асфальт зауыты аукционға шығарылды, деп хабарлайды "Адырна" ұлттық порталы,
Қаржы министрлігі Мемлекеттік кірістер комитетінің мәліметінше, мүлік компанияның салық берешегін өтеу үшін сатылмақ.
Аукционға Аягөз қаласында орналасқан стационарлық, циклдік E-mak Express 204 FUM асфальт зауыты қойылды. 2025 жылғы 28 қарашада жасалған бағалау есебіне сәйкес, мүліктің нарықтық құны 245,5 миллион теңгені құрайды. Сауда мемлекеттік “Міндет” сервисінде өтеді және 26 желтоқсан күні сағат 11:00-де басталады. Бастапқы (ең төменгі) сату бағасы 159,6 миллион теңге, кепілдік жарнасы 36,8 миллион теңге деп көрсетілген.
eGov деректеріне сәйкес, “К-Дорстрой” компаниясының шамамен мыңға жуық құрылтайшысы бар. Бірақ олардың есімдері жарияланбайды. Компания 1993 жылы тіркелген. Kompra сервисінің мәліметінше, құрылған сәтінен бастап 2019 жылға дейін ресми түрде көрсетілген құрылтайшылары болмаған.
DFO порталында жарияланған 2022 жылғы қаржылық есепке сәйкес, “К-Дорстрой” акцияларының 95%-ы “Целинтрансстрой” компаниясына тиесілі. Kompra мәліметінше, бұл компанияның иелері — Сабит Қанатов пен Тахип Искандаров. Сабит Қанатов 2000 жылдардың басында Мемлекеттік кірістер вице-министрі әрі Салық комитетінің төрағасы болған. 2008 жылы БАҚ оның ірі көлемде салық төлеуден жалтарғаны үшін сотталып, кейін рақымшылыққа іліккенін хабарлаған.
Компанияның 2022 жылғы шығыны 2,77 миллиард теңгені құраған. Сондай-ақ 2024 жылдың жазында Бас әскери прокуратура мемлекетке келтірілген залалдың 1 миллиард теңгеге жуық бөлігі өтелгенін мәлімдеген. Сот қорғаныс министрлігінің талап-арызын қанағаттандырып, компаниядан 1 миллиард 36 миллион теңге аванс пен 31 миллион теңге өсімпұл өндіру туралы шешім шығарған.
