تۇركىستان وبلىسىندا كەلەس وزەنى ارقىلى وتەتىن كوپىر قۇلادى. وقىس وقيعا 17 جەلتوقساندا بولعان، دەپ حابارلايدى «ادىرنا» ءتىلشىسى.
اۋدان اكىمىنىڭ ءباسپاسوز قىزمەتى كوپىردىڭ قوشقاراتا اۋىلدىق وكرۋگىنىڭ اۋماعىندا ورنالاسقانىن جانە كەلەس وزەنى ارقىلى وتەتىن وبلىستىق ماڭىزى بار اۆتوجولدىڭ ءبىر بولىگى ەكەنىن مالىمدەدى.
الدىن الا مالىمەتكە سايكەس، كوپىردىڭ ۇزاق جىلدار پايدالانىلۋى جانە تىرەك باعانالارىنىڭ ءتۇبىنىڭ شايىلۋى سالدارىنان قاۋىپ تۋىنداعان.
«كەلەس اۋدانىنىڭ اكىمى جانىبەك اعىباەۆ وقيعا ورنىنا بارىپ، كوپىردىڭ جاعدايىمەن تانىستى. قاۋىپسىزدىكتى قامتاماسىز ەتۋ ماقساتىندا كوپىر ارقىلى كولىك قوزعالىسى ۋاقىتشا توقتاتىلدى»،-دەلىنگەن حابارلامادا.
ايتا كەتەيىك، كولىك قوزعالىسى ءۇشىن الپامىس جانە بىرتىلەك اۋىلدىق وكرۋگتەرى ارقىلى 10–15 شاقىرىمدى قۇرايتىن اينالما جولدار ۇيىمداستىرىلعان. وقيعا ورنىنا توتەنشە جاعدايلار، پوليتسيا جانە جەرگىلىكتى اتقارۋشى ورگان وكىلدەرى جۇمىلدىرىلعان.
