الماتىداعى الاتاۋ اۋدانى تۇرعىندارى بۇگىن تاعى دا داۋ شىعاردى. بۇل جولى توميريس شاعىن اۋدانىنىڭ تۇرعىنى اكىمدىك ءۇيىمدى بۇزسا، ءوزىمدى ورتەپ جىبەرەمىن دەپ مالىمدەدى. ەر ادام ەنەسىنىڭ اتىنداعى جەرگە ءۇي سالىپ، قابىرعاسىن تۇرعىزىپتى. بىتۋگە تاياعاندا، اكىمدىكتەگى اتقامىنەرلەر ءۇيىن بۇزۋعا كەلىپتى. ويتكەنى بۇل جەردىڭ زاڭدى قۇجاتى جوق ەكەن. بۇل تۋرالى Stan.kz اقپارات اگەنتتىگى حابارلايدى.
عالىمجان سەرىكۇلى - ءبىرىنشى توپتاعى مۇگەدەك. ەنەسىنىڭ اتىنداعى جەرگە سالعان ۇيگە قاققان ءبىر تال شەگەنى، شەكەمنەن اققان تەرگە بالاپ جۋىردا كىرگەلى وتىرعانمىن دەيدى.
"بۇل جەر نەگىزى ەنەمنىڭ اتىندا بولعان، شەشىمى بار. وسى ۋاقىتشا ءۇي سالعان ول كىسىلەر. سونىمەن وسىلاي مەنىڭ دەنساۋلىعىم جارامسىز بولىپ قالعاننان كەيىن، ەندى قۇجاتى تولىعىمەن بىتپەگەننەن كەيىن، سەنىڭ دەنساۋلىعىڭ جارامسىز، ءوزىڭ قۇجاتىن ءجاي-ءجاي تۋرالاپ الاسىڭ دەگەننەن كەيىن، سالعانمىن وسى جەردى", - دەدى عالىمجان سەرىكۇلى.
بۇل وتباسى جەردىڭ قۇجاتىن راسىمدەۋگە ارىز دا بەرىپتى. الايدا ءوتىنىش قارالماعان.
عالىمجاننىڭ جارىنىڭ سوزىنشە، ەندى ءۇي بىتكەندە، اكىمدىكتە بەلسەندى بولىپ جۇرگەن باعدات ەسىمدى قىزمەتكەر ءدال وسى جەرگە تالاسقان.
ال ءوزىن الاتاۋ اۋدانى اكىمدىگىندە ءجاي بەلسەندىمىن دەپ تانىستىرعان ازامات، اكىمدىك ءبارىن بىلىقتىرعان دەپ اشۋلى.
"مەن اكىمدىككە بارىپ ايتامىن، نەگە سەندەر تانىسپەنەن جاساتاسىڭدار جەردى دەپ. "ساموزاحۆات" قانشا جىلدان بەرى توقتادى، ەلدىڭ ءبارى بىلەدى، 5-6 جىل بولىپ كەتتى. مەن دە وسىلار ۇقساپ جەر باسىپ العىم كەلەدى", - دەدى الاتاۋ اۋدانى بەلسەندىسى باعدات قوجامقۇلوۆ.
الايدا الاتاۋ اۋدانى اكىمدىگى جەردى راسىمدەۋ قالالىق اكىمدىكتىڭ جەر كوميتەتىنە تيەسىلى دەپ وتىر. سوندىقتان شاراسىز ەكەنىن ايتادى. الايدا بۇزۋعا بۇيرىق كەلسە، ورىندايتىنىن مالىمدەدى.
"جەر كوميسسياسى بار، ول كوميسسيانىڭ شەشىمىنە سايكەس بۇل كىسىلەردىڭ قولىندا مەملەكەتتىك اكت جوق. بۇل مەملەكەتتىك رەزەرۆتە تۇرعان جەر. بۇل جەرگە زاڭسىز ءۇي -قۇرىلىسىن باسىپ الۋى جولىمەن، زاڭسىز ءۇي سالعان", - دەدى الاتاۋ اۋدانى اكىمدىگىنىڭ ءوزىن-ءوزى باسقارۋ كوميتەتىنىڭ توراعاسى داۋلەت احمەتوۆ.
عالىمجان تىرنەكتەپ تۇرعىزعان ءتورت قابىرعانى بۇزاتىن بولسا، ءۇي يەسى ءوزىمدى ورتەيمىن دەپ وتىر.
ال الاتاۋ اكىمدىگى بۇل جەردى زاڭسىز باسىپ العاندىقتان قۇجات شىقپاعان، سوندىقتان ەندى نە وزدەرى بۇزىپ السىن، نە سوت تاس-تالقان ەتەدى دەپ مالىمدەدى.
