AMANAT پارتياسى فراكتسياسىنىڭ مۇشەسى ەرلان سايروۆ قوعامدا كۇشەيىپ كەلە جاتقان رۋشىلدىق تەندەنتسياعا الاڭداۋشىلىق ءبىلدىردى. ونىڭ ايتۋىنشا، سوڭعى كەزدەرى بىرلىك پەن تۇتاستىقتى نىعايتۋدان گورى، حالىقتى جىككە بولۋگە باعىتتالعان ۇردىستەر بەلەڭ الىپ بارادى، دەپ حابارلايدى «ادىرنا» ءتىلشىسى.
دەپۋتات پرەزيدەنت قاسىم-جومارت توقاەۆتىڭ «تاۋەلسىزدىك بارىنەن دە قىمبات» دەگەن ءسوزىن ەسكە سالىپ، تاۋەلسىزدىكتى ساقتاپ قالۋدىڭ باستى شارتى — ۇلتتىق بىرلىك، ىنتىماق پەن تۇتاستىق ەكەنىن اتاپ ءوتتى.
ەرلان سايروۆتىڭ پىكىرىنشە، جەكەلەگەن كونتەنت وندىرۋشىلەر مەن كاسىپكەرلەر رۋشىلدىقتى «برەند» پەن «ماركەتينگتىك ونىمگە» اينالدىرىپ، كۇندەلىكتى تۇتىناتىن كيىمدەرگە رۋ اتاۋلارىن جازىپ ساتۋدى ادەتكە اينالدىرعان.
«جەكەلەگەن كونتەنت وندىرۋشىلەر مەن كاسىپكەرلەر رۋلىق سانانى جالاۋلاتىپ، كۇندەلىكتى تۇتىناتىن فۋتبولكا مەن شاپاندارعا رۋ اتاۋىن جازىپ، ولاردى «برەند» نەمەسە «ماركەتينگتىك ءونىم» رەتىندە ساتىلىمعا شىعارۋدا. الەۋمەتتىك جەلىلەردە جاستارعا رۋشىلدىق پسيحولوگيانى تاڭاتىن كونتەنت شەكتەن شىعىپ كەتتى. بۇل ۇلتتىڭ بىرلىگىن ىشىنەن قۇرتاتىن قاۋىپتى تەندەنتسيا كينوعا دا جەتتى. وسىنداي كەلىسسىز، قاجەتسىز تاقىرىپتى ارقاۋ ەتكەن ارنايى فيلم پروكاتقا شىعىپتى. بۇل ارقىلى كينو تۇسىرۋشىلەردىڭ نە ايتپاق بولعانى تۇسىنىكسىز؟! قازاقتىڭ رۋلارىن سالىستىراتىن، كەمسىتەتىن فيلمدەردىڭ ماقساتى قانداي؟ ءتىپتى بۇل ءفيلمدى جارنامالاۋ ءۇشىن جاسالعان ارنايى ەكزپوزيتسيادا رۋعا ءبولىنۋدى قويىپ، قازاقستاننىڭ كارتاسىن ءۇش جۇزگە ءبولىپ قويعاندى كوردىك. بۇل نە دەگەن باسسىزدىق؟ ول – ۇلت ءۇشىن ەڭ سەزىمتال تاقىرىپتى ايقايلاتىپ الەۋمەتتىك كونتەنت، كينو تاقىرىبىنا اينالدىرىپ، كورەرمەن جيناۋ. ءتۇبى بۇل جاقسىلىققا اكەلمەيدى»،-دەدى ول.
دەپۋتات مۇنداي ارەكەتتەردىڭ ۇلت بىرلىگىن ىشتەن ىرىتەتىن قاۋىپتى قۇبىلىس ەكەنىن اتاپ ءوتتى. ونىڭ ايتۋىنشا، شىعارماشىلىق ەركىندىك ماڭىزدى بولعانىمەن، ول مەملەكەتتىلىك پەن ۇلتتىق تۇتاستىققا زيان كەلتىرمەۋى ءتيىس. اسىرەسە، جاسوسپىرىمدەرگە كينو مەن مەدياكونتەنتتىڭ تاربيەلىك ىقپالى زور ەكەنىن ەسكەرگەن ءجون.
«وسىعان بايلانىستى كەلەسى شارالاردى قابىلداۋ ورىندى دەپ سانايمىن:
1. اقپارات جانە مادەنيەت مينيسترلىگى جانىنان كينوپروكاتقا شىعاتىن وتاندىق فيلمدەردىڭ مازمۇنىن الدىن الا كوركەمدىك-ەستەتيكالىق، يدەولوگيالىق، ۇلتتىق بىرلىك تۇرعىسىنان ساراپتايتىن تۇراقتى كوميسسيا قۇرۋدى تۇردە ىسكە اسىرۋ قاجەت.
2. «ۇلتتىق كود» جانە «مادەني ەرەكشەلىك» ۇعىمىن جەلەۋ ەتىپ، قوعامدى بولشەكتەۋگە، رۋشىلدىق پەن جىكشىلدىكتى ناسيحاتتايتىن ارەكەتتەرگە ناقتىتوسقاۋىل قويۋ كەرەك.
3. مادەني سالادا، الەۋمەتتىك جەلىدە،قازاقستاننىڭ بارلىق حالىقتارىنىڭ بىرلىگىن كورسەتەتىن، جالپىۇلتتىق ء«بىز قازاقپىز» دەگەن ماعىناداعى كونتەنتتى كوبەيتۋگە كىرىسۋىمىز ءتيىس»،-دەدى سايروۆ.
