AMANAT partiiasy fraksiiasynyŋ müşesı Erlan Sairov qoǧamda küşeiıp kele jatqan ruşyldyq tendensiiaǧa alaŋdauşylyq bıldırdı. Onyŋ aituynşa, soŋǧy kezderı bırlık pen tūtastyqty nyǧaitudan görı, halyqty jıkke böluge baǧyttalǧan ürdıster beleŋ alyp barady, dep habarlaidy «Adyrna» tılşısı.
Deputat Prezident Qasym-Jomart Toqaevtyŋ «Täuelsızdık bärınen de qymbat» degen sözın eske salyp, täuelsızdıktı saqtap qaludyŋ basty şarty — ūlttyq bırlık, yntymaq pen tūtastyq ekenın atap öttı.
Erlan Sairovtyŋ pıkırınşe, jekelegen kontent öndıruşıler men käsıpkerler ruşyldyqty «brend» pen «marketingtık önımge» ainaldyryp, kündelıktı tūtynatyn kiımderge ru ataularyn jazyp satudy ädetke ainaldyrǧan.
«Jekelegen kontent öndıruşıler men käsıpkerler rulyq sanany jalaulatyp, kündelıktı tūtynatyn futbolka men şapandarǧa ru atauyn jazyp, olardy «brend» nemese «marketingtık önım» retınde satylymǧa şyǧaruda. Äleumettık jelılerde jastarǧa ruşyldyq psihologiiany taŋatyn kontent şekten şyǧyp kettı. Būl ūlttyŋ bırlıgın ışınen qūrtatyn qauıptı tendensiia kinoǧa da jettı. Osyndai kelıssız, qajetsız taqyrypty arqau etken arnaiy film prokatqa şyǧypty. Būl arqyly kino tüsıruşılerdıŋ ne aitpaq bolǧany tüsınıksız?! Qazaqtyŋ rularyn salystyratyn, kemsıtetın filmderdıŋ maqsaty qandai? Tıptı būl filmdı jarnamalau üşın jasalǧan arnaiy ekzpozisiiada ruǧa bölınudı qoiyp, Qazaqstannyŋ kartasyn üş jüzge bölıp qoiǧandy kördık. Būl ne degen bassyzdyq? Ol – ūlt üşın eŋ sezımtal taqyrypty aiqailatyp äleumettık kontent, kino taqyrybyna ainaldyryp, körermen jinau. Tübı būl jaqsylyqqa äkelmeidı»,-dedı ol.
Deputat mūndai äreketterdıŋ ūlt bırlıgın ışten ırıtetın qauıptı qūbylys ekenın atap öttı. Onyŋ aituynşa, şyǧarmaşylyq erkındık maŋyzdy bolǧanymen, ol memlekettılık pen ūlttyq tūtastyqqa ziian keltırmeuı tiıs. Äsırese, jasöspırımderge kino men mediakontenttıŋ tärbielık yqpaly zor ekenın eskergen jön.
«Osyǧan bailanysty kelesı şaralardy qabyldau oryndy dep sanaimyn:
1. Aqparat jäne mädeniet ministrlıgı janynan kinoprokatqa şyǧatyn otandyq filmderdıŋ mazmūnyn aldyn ala körkemdık-estetikalyq, ideologiialyq, ūlttyq bırlık tūrǧysynan saraptaityn tūraqty komissiia qūrudy türde ıske asyru qajet.
2. «Ūlttyq kod» jäne «mädeni erekşelık» ūǧymyn jeleu etıp, qoǧamdy bölşekteuge, ruşyldyq pen jıkşıldıktı nasihattaityn äreketterge naqtytosqauyl qoiu kerek.
3. Mädeni salada, äleumettık jelıde,Qazaqstannyŋ barlyq halyqtarynyŋ bırlıgın körsetetın, jalpyūlttyq «Bız Qazaqpyz» degen maǧynadaǧy kontenttı köbeituge kırısuımız tiıs»,-dedı Sairov.
