قوستاناي قالاسىندا جول-كولىك وقيعاسى سالدارىنان 68 جاستاعى ايەل قازا تاپتى، دەپ حابارلايدى "ادىرنا" ۇلتتىق پورتالى.
وقيعا 12 جەلتوقسان كۇنى بولعان.
ول جاياۋ جۇرگىنشىلەر وتكەلى ارقىلى جولدان ءوتىپ بارا جاتقاندا جەڭىل اۆتوكولىك قاعىپ كەتكەن.
وقيعا ءساتىنىڭ ۆيدەوسى الەۋمەتتىك جەلىلەردە تارادى. بەينەجازبادا اۆتوبۋستىڭ جۇرگىزۋشىسى جاياۋ جۇرگىنشىنى وتكىزۋ ءۇشىن وتكەلدە توقتاعانى كورىنەدى. الايدا قارسى باعىتتا كەلە جاتقان كولىك جۇرگىزۋشىسى جاياۋ جۇرگىنشىنى بايقاماي، زەينەتكەر ايەلدى قاعىپ كەتكەن.
وبلىستىق پوليتسيا دەپارتامەنتىنىڭ مالىمەتىنشە، اتالعان دەرەك بويىنشا قىلمىستىق ءىس قوزعالدى. تەرگەۋ «جول ءجۇرىسى قاعيدالارىن بۇزۋ، ابايسىزدا ادام ولىمىنە اكەپ سوقتىرۋ» بابى بويىنشا جۇرگىزىلىپ جاتىر. قازىرگى ۋاقىتتا بارلىق قاجەتتى تەرگەۋ امالدارى اتقارىلىپ، وقيعانىڭ ءمان-جايى انىقتالۋدا.
ۆەدومستۆونىڭ ناقتىلاۋىنشا، ۆاز-2114 ماركالى اۆتوكولىكتىڭ جۇرگىزۋشىسى ق. باتىر داڭعىلىمەن قوزعالىپ كەلە جاتىپ، رەتتەلمەيتىن جاياۋ جۇرگىنشىلەر وتكەلىنەن ءوتىپ بارا جاتقان 68 جاستاعى ايەلدى قاعىپ كەتكەن. العان اۋىر جاراقاتتارىنىڭ سالدارىنان جابىرلەنۋشى وقيعا ورنىندا كوز جۇمدى.
كۇدىكتى ۇستالىپ، ۋاقىتشا ۇستاۋ يزولياتورىنا قامالدى.
