ورالدا بوس تۇرعان پاتەردە ءورت شىعىپ، ارتىنشا ۇلكەن جارىلىس بولدى. وقيعانىڭ بارىسى الەۋمەتتىك جەلىدە جاريالاندى، دەپ حابارلايدى "ادىرنا".
توتەنشە جاعداي بۇگىن، 12 جەلتوقسان كۇنى ساعات 14:00-دە تسيولكوۆسكي كوشەسىندە بولدى.
ءورت كوپقاباتتى ءۇيدىڭ ءۇشىنشى قاباتىنان باستالعان. ءورت سوندىرۋشىلەر ىشتەگى تۇرعىنداردى ساتى ارقىلى بالكوننان قۇتقارماق بولعانمەن، جارىلىس بولىپ، بالكونىن وپىرىپ تۇسىرگەنىن بايقاۋعا بولادى. ءورتتى كۋاگەرلەر ۆيدەوعا ءتۇسىرىپ الدى.
«2025 جىلعى 12 جەلتوقساندا بقو تجد 112 كەزەكشى ديسپەتچەرلىك قىزمەتىنە بەس قاباتتى تۇرعىن ءۇيدىڭ ءۇشىنشى قاباتىندا ورنالاسقان پاتەردىڭ بالكون تەرەزەسىنەن قاتتى ءتۇتىن شىققانى تۋرالى حابار ءتۇستى. وقيعا ورنىنا جەدەل جەتكەن ءورت ءسوندىرۋ بولىمدەرى پاتەردە جەكە زاتتار مەن جيھازدىڭ اشىق جالىنمەن ورتەنىپ جاتقانىن انىقتادى.
ءورتتى ءسوندىرۋ گاز-اۋا قوسپاسىنىڭ جارىلۋى سالدارىنان قيىندادى، ناتيجەسىندە تەرەزە راماسى مەن بالكون شىنىسى سىندى. قازىرگى ۋاقىتتا زارداپ شەككەندەر تۋرالى اقپارات جوق، كورشىلەردىڭ ايتۋىنشا، اتالمىش پاتەردە ەشكىم تۇرمايدى.
قۇتقارۋشىلار جۇرگىزگەن دەر كەزىندە ەۆاكۋاتسيانىڭ ارقاسىندا ءۇي تۇرعىندارى اۋىر زارداپتاردان امان قالدى. ءورت تولىقتاي 10 م² اۋماقتا ءسوندىرىلدى. ءورتتىڭ شىعۋ سەبەبى انىقتالۋدا. ءورتتى سوندىرۋگە تجد-دان 23 قىزمەتكەر جانە 6 بىرلىك تەحنيكا جۇمىلدىرىلدى»، – دەيدى تجم اگەنتتىك تىلشىسىنە بەرگەن پىكىرىندە.
