فوتو: kazaknews.kz
قازاقستان، قىرعىزستان جانە وزبەكستان (قاراقالپاقستان) حالىقتارىنىڭ كيىز ءۇي جاساۋداعى ءداستۇرلى بىلىمدەرى مەن شەبەرلىگى يۋنەسكو-نىڭ ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتى تىزىمىنە ەنگىزىلدى. بۇل شەشىم 10 جەلتوقساندا نيۋ-دەليدە ءوتىپ جاتقان ماتەريالدىق ەمەس مادەني مۇرانى قورعاۋ جونىندەگى ۇكىمەتارالىق كوميتەتتىڭ 20-سەسسياسىندا ءبىراۋىزدان قابىلداندى، دەپ حابارلايدى "ادىرنا".
يۋنەسكو-عا جولدانعان نوميناتسيادا كيىز ءۇيدىڭ تەك باسپانا عانا ەمەس، قىرعىز، قازاق جانە قاراقالپاق حالىقتارىنىڭ ۇلتتىق بولمىسىن ايقىندايتىن مادەني سيمۆول ەكەنى اتاپ ءوتىلدى. كيىز ءۇي جاساۋ ءداستۇرى عاسىرلار بويى شەبەردەن شاكىرتكە بەرىلىپ، ۇرپاق ساباقتاستىعىنىڭ ماڭىزدى بولىگىنە اينالعان.
بۇل ەلەمەنت العاش رەت 2014 جىلى قازاقستان مەن قىرعىزستاننىڭ باستاماسىمەن تىزىمگە ۇسىنىلعان ەدى. كەيىن وزبەكستان قاراقالپاق كيىز ءۇيىن قوسۋ ارقىلى نوميناتسيانى كەڭەيتۋ جونىندە باستاما كوتەردى. وسىلايشا ءۇش ەل بىرلەسكەن تۇردە مادەني مۇرانى يۋنەسكو دەڭگەيىندە قورعاۋعا قول جەتكىزدى.
بيىل كوميتەت جالپى 68 نوميناتسيانى قاراۋدا. ولاردىڭ قاتارىندا جاپونيانىڭ ءداستۇرلى قولونەر قاعازى، ءۇندىستاننىڭ ديۆالي مەرەكەسى، مىسىردىڭ ۇلتتىق تاعامى – كوشاري جانە شۆەيتساريانىڭ يودل ءان ايتۋ ءداستۇرى بار.
يۋنەسكو مالىمەتىنشە، قازىرگى تاڭدا ماتەريالدىق ەمەس مادەني مۇرانىڭ حالىقارالىق تىزىمدەرىندە 153 ەلدەن 812 ەلەمەنت بار.
