بۇگىن، 10 جەلتوقساندا استاناعا يران يسلام رەسپۋبليكاسىنىڭ پرەزيدەنتى ماسۋد پەزەشكيان كەلدى. ول ەرتەڭ مەملەكەت باسشىسى قاسىم-جومارت توقاەۆپەن ەكىجاقتى رەسمي كەزدەسۋ وتكىزەدى، دەپ حابارلايدى «ادىرنا» ءتىلشىسى.
يران پرەزيدەنتىن اۋەجايدان پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسۇلان ماديەۆ مىرزا قارسى الدى.
ماسۋد پەزەشكيان قازاقستانعا اتتانار الدىندا بۇل ساپاردىڭ تەگەران مەن استانا اراسىنداعى بايلانىستاردى جان-جاقتى دامىتۋعا كەڭ مۇمكىندىك اشاتىنىن ايتقان ەدى.
يران ۇكىمەتى باسشىسىنىڭ ايتۋىنشا، ساپار نەگىزگى سالالارداعى ارىپتەستىكتى جانداندىرۋعا قولايلى پلاتفورما قالىپتاستىرماق.
«قازاقستانعا ساپار ەكونوميكالىق، ونەركاسىپتىك، تاۋ-كەن ءوندىرىسى، سونداي-اق مادەني جانە كولىك سالالارىنداعى ىنتىماقتاستىقتى تەرەڭدەتۋگە قولايلى مۇمكىندىك پەن نەگىز بولىپ تابىلادى»،- دەدى پرەزيدەنت.
پەزەشكيان يران سىرتقى ساياساتىنىڭ يسلام الەمىنە جاقىنداسۋعا باعىتتالعان ستراتەگيالىق باعىتىنا دا نازار اۋداردى. ونىڭ ايتۋىنشا، مۇسىلمان ەلدەرىمەن قارىم-قاتىناس سەنىم مەن ءوزارا ىنتىماقتاستىقتىڭ جاڭا دەڭگەيىنە كوتەرىلۋى ءتيىس.
ء«بىزدىڭ مۇسىلمان مەملەكەتتەرىمەن بايلانىستارىمىز ورتاق سەنىمدەر مەن كوزقاراستارعا سۇيەنە وتىرىپ، ودان دا تىعىز ءارى تەرەڭ بولۋى كەرەك. ءبىر-بىرىمىزگە كومەك كورسەتىپ، جيناعان تاجىريبەمىزبەن بولىسۋگە ۇمتىلۋىمىز قاجەت»، — دەپ تۇيىندەدى يران باسشىسى.
