دوپينگ داۋىنا ىلىككەن بەلگىلى بوكسشى جانىبەك ءالىمحانۇلى الەۋمەتتىك جەلى ارقىلى ۇندەۋ جاسادى، دەپ حابارلايدى «ادىرنا» ءتىلشىسى.
سپورتشى قولداۋ بىلدىرگەن بارشا جانعا العىسىن جەتكىزدى.
«شەتەلدىكتەر داۋعا قۋانىپ جاتقاندا، ءوز قازاعىم ولارعا قوسىلماي، جاتقا جىعىپ بەرمەي، قاسىمنان تابىلىپ، تازا ەكەنىمىزگە سەنىم ءبىلدىرىپ جاتقانى جانىڭا دەمەۋ بولادى ەكەن»،-دەدى ول.
بوكسشى جانكۇيەرلەرىنىڭ قيىندىقتا دا قاسىنان تابىلعانىن ەرەكشە اتاپ ءوتتى.
«مەنىڭ ءبىر قۋاناتىنىم، بوكس كارەرامدا جامان جانكۇيەر جيناماپپىن. مەن قازاققا بولىساتىن، قازاق ءۇشىن جانى اۋىراتىن، قازاققا جاقتاساتىن جانكۇيەر جيناپپىن. مەنىڭ جانكۇيەرلەرىم تەك كوك تۋدى جەلبىرەتكەندە عانا قاسىمنان تابىلاتىن ەمەس، قيىندىقتا دا قولدايتىن جانكۇيەر ەكەن. بۇل تۇسىنە بىلگەنگە ۇلكەن باق!» – دەپ جازدى جانىبەك ءالىمحانۇلى.
ەسكە سالايىق، ءالىمحانۇلى 7 جەلتوقساندا سان-انتونيودا WBA چەمپيونى ەريسلاندي لارامەن بىرىكتىرۋشى جەكپە-جەك وتكىزۋى كەرەك بولاتىن. الايدا 3 جەلتوقسانعا قاراعان ءتۇنى قازاقستاندىق سپورتشىنىڭ دوپينگ سىناماسىنان تىيىم سالىنعان مەلدوني دارىلىك زاتى تابىلعانى ايتىلدى. وسىدان كەيىن ۇيىمداستىرۋشىلار ونى جەكپە-جەكتەن شەتتەتتى.
