2026 جىلدان باستاپ ۇلكەن الماتى اينالما اۆتوموبيل جولىندا جاڭا تاريف ەنگىزىلەدى. اكىمشىلىك وكىلدەرىنىڭ ايتۋىنشا، بۇل وزگەرىستەر جولاقىنى ۋاقىتىلى تولەۋدى ىنتالاندىرۋعا باعىتتالعان، دەپ حابارلايدى «ادىرنا» ءتىلشىسى.
2026 جىلدان باستاپ جول ءجۇرۋ ءتاريفىنىڭ قۇنىن ارتتىرۋ جوسپارلانىپ وتىر:
- جەڭىل اۆتوكولىكتەر ءۇشىن — 0,07-تەن 0,14 اەك-كە دەيىن (605,5 ₸);
- كولىك قۇرالدارىنىڭ باسقا ساناتتارى ءۇشىن — ساناتقا سايكەس مولشەردە (تولىعىراق كەستەدە).
️2026 جىلعى 1 قاڭتاردان باستاپ ايلىق ەسەپتىك كورسەتكىشتىڭ (اەك) مولشەرى بولجامعا سايكەس 4 325 تەڭگە بولادى.
ايتا كەتەيىك، تاريف جولدا ءبىر ساعاتقا تەڭ مولشەردەگى ۋاقىتقا جانە كولىك قۇرالىنىڭ ساناتىنا بايلانىستى ەسەپتەلەدى.
تاريفتەردىڭ وزگەرۋىمەن قاتار الدىن الا تولەم نەمەسە كەيىنگى تولەم قولدانىلعان جاعدايدا 50% جەڭىلدىك مەحانيزمىن ەنگىزۋ جوسپارلانۋدا:
الدىن الا تولەم – اقىلى جولعا كىرگەنگە دەيىن جەكە شوتقا نەمەسە كولىك نومىرىنە اقشا قاراجاتىن اۋدارۋ. بۇل جاعدايدا پايدالانۋشىعا بەلگىلەنگەن ءتاريفتىڭ 50% مولشەرىندە جەڭىلدىكپەن تولەۋ مۇمكىندىگى بەرىلەدى.
كەيىنگى تولەم – جولدى ءجۇرىپ وتكەننەن كەيىن 7 كۇنتىزبەلىك كۇن ىشىندە تولەم جاساۋ جول اقىسىنا 50% جەڭىلدىك الۋعا مۇمكىندىك بەرەدى. ەگەر تولەم كورسەتىلگەن مەرزىم ىشىندە تۇسپەسە، 7 كۇن وتكەن سوڭ بەرەشەك قالىپتاسادى جانە جولاقى جەڭىلدىكسىز، تولىق مولشەردە وندىرىلەدى.
“تالعار، قاراساي جانە ىلە اۋداندارىنىڭ ەلدى مەكەندەرىندە تىركەلگەن تۇرعىندارعا ارنالعان قولدانىستاعى ايلىق جانە جىلدىق ابونەمەنتتەردىڭ قۇنى وزگەرىسسىز قالادى”، – دەلىنگەن حابارلامادا.
