سولتۇستىك قازاقستان وبلىسى جامبىل اۋدانى پەتروۆكا اۋىلى ماڭىندا ورناتىلعان مىرجاقىپ دۋلاتۇلىنا ارنالعان مەموريالدىق كەشەننىڭ بۇزىلعانى تۋرالى حابار الەۋمەتتىك جەلىلەردە كەڭ تارالىپ، كوپشىلىكتىڭ نارازىلىعىن تۋدىردى. جەلى قولدانۋشىلارى مەن الاشتانۋشى عالىمدار بۇل ارەكەتتى «قاساقانا جاسالعان ۆانداليزم» دەپ باعالاپ وتىر، دەپ حابارلايدى “ادىرنا”.
ال كەشەندى تۇرعىزۋعا اتسالىسقان كاسىپكەرلەر جۇمىسقا جەرگىلىكتى اكىمدىك كەدەرگى كەلتىرگەنىن ايتسا، وبلىس اكىمىنىڭ ورىنباسارى كەرىسىنشە، قۇرىلىس رۇقساتسىز باستالعانىن مالىمدەۋدە.
ادەبيەت تاريحشىسى، سىنشى، الاشتانۋشى زاڭعار كارىمحان الەۋمەتتىك جەلىدەگى جازباسىندا پەتروۆكا اۋىلى ماڭىنداعى مىرجاقىپ دۋلاتۇلىنا ارنالعان مەموريالدىق كەشەن «وبلىس اكىمدىگى تاراپىنان قاساقانا قيراتىلعانىن» جازدى.
ونىڭ ايتۋىنشا، كەشەندى تۇرعىزعان ازاماتتار اكىمدىك ارنايى تەحنيكا، كران جانە جۇمىسشىلار جىبەرىپ، قۇرىلىمدى بۇزۋعا كىرىسكەنىن حابارلاعان. سيمۆولدىق ءمانى بار قىران ءمۇسىنى، جارىق شام باعاندارى جانە مەموريالدىق تاقتا زاقىمدالعان.
جەلىدە تاراعان اقپاراتتا وبلىس اكىمدىگى «الاش قايراتكەرلەرىنە 28 مەترلىك ەسكەرتكىش ورناتۋعا بولمايدى» دەگەن ءۋاج بىلدىرگەنى ايتىلعان. الايدا بۇل پىكىرگە قاتىستى رەسمي تۇسىنىكتەمە جوق.
زاڭعار كارىمحان مۇنداي ارەكەتتىڭ سەبەبى تۇسىنىكسىز ەكەنىن، كەشەن تولىق بۇزىلماعانىمەن، ۇلكەن زيان كەلگەنىن اتاپ ءوتتى.
جاعدايعا بايلانىستى سولتۇستىك قازاقستان وبلىسىنىڭ ىشكى ساياسات باسقارماسى رەسمي تۇسىنىكتەمە بەردى.
«ميرنىي اۋىلدىق وكرۋگىنىڭ اۋماعىندا كاسىپكەر بارلىباەۆ ناعاشىباي سابارۇلى الاش قىزمەتىن ەسكە الۋ ماقساتىندا ستەللا ورناتقان بولاتىن. الايدا مونۋمەنت ەكى سەبەپكە بايلانىستى بولشەكتەلىپ، كونسەرۆاتسياعا قويىلدى: ستەللا تۇرعىزۋ كەزىندە ماماندار توپىراقتىڭ وتىرۋىن تىركەپ، سونىڭ سالدارىنان قۇرىلىستىڭ قيسايۋى پايدا بولعان. مۇنداي جىلجۋ ستەللانىڭ ورنىقتىلىعى مەن قاۋىپسىزدىگىنە كەرى اسەر ەتۋى مۇمكىن ەدى. قۇجاتتاردىڭ (ارحيتەكتۋرالىق-جوسپارلاۋ تاپسىرماسى، بەكىتىلگەن ەسكيزدىك جوبا) بولماۋى. مەملەكەتتىك ساۋلەت-قۇرىلىستى باقىلاۋ ورگانى ن.س. بارلىباەۆقا اكىمشىلىك ايىپپۇل سالدى»، دەلىنگەن جاۋابىندا.
ال وبلىس اكىمىنىڭ ورىنباسارى ءجۇسىپ جۇماعۇلوۆ بۇل ىسكە اكىمدىكتىڭ قاتىسى جوق ەكەنىن ايتتى.
"جالپى بۇل كاسىپكەر (ناعاشىباي بارلىباەۆ) ەشكىمگە ەشتەڭە ايتپاي قۇرىلىستى ءوزى باستاعان، ەندى ءوزى بۇزىپ تاستاعان. اكىمدىكتىڭ قاتىسى جوق. بۇعان دەيىن دە ءبىرشاما ادامدار حابارلاسقان. تەكسەرىستى وتكىزگەننەن كەيىن ءبىز وعان ەشقانداي جەر تەلىمى رەسمي تۇردە بەرىلمەگەنىن، رۇقسات قۇجاتتارى جوق ەكەنىن بىلدىك”، – دەدى اكىم ورىنباسارى.
