Soltüstık Qazaqstan oblysy Jambyl audany Petrovka auyly maŋynda ornatylǧan Mırjaqyp Dulatūlyna arnalǧan memorialdyq keşennıŋ būzylǧany turaly habar äleumettık jelılerde keŋ taralyp, köpşılıktıŋ narazylyǧyn tudyrdy. Jelı qoldanuşylary men alaştanuşy ǧalymdar būl ärekettı «qasaqana jasalǧan vandalizm» dep baǧalap otyr, dep habarlaidy “Adyrna”.
Al keşendı tūrǧyzuǧa atsalysqan käsıpkerler jūmysqa jergılıktı äkımdık kedergı keltırgenın aitsa, oblys äkımınıŋ orynbasary kerısınşe, qūrylys rūqsatsyz bastalǧanyn mälımdeude.
Ädebiet tarihşysy, synşy, alaştanuşy Zaŋǧar Kärımhan äleumettık jelıdegı jazbasynda Petrovka auyly maŋyndaǧy Mırjaqyp Dulatūlyna arnalǧan memorialdyq keşen «oblys äkımdıgı tarapynan qasaqana qiratylǧanyn» jazdy.
Onyŋ aituynşa, keşendı tūrǧyzǧan azamattar äkımdık arnaiy tehnika, kran jäne jūmysşylar jıberıp, qūrylymdy būzuǧa kırıskenın habarlaǧan. Simvoldyq mänı bar qyran müsını, jaryq şam baǧandary jäne memorialdyq taqta zaqymdalǧan.
Jelıde taraǧan aqparatta oblys äkımdıgı «Alaş qairatkerlerıne 28 metrlık eskertkış ornatuǧa bolmaidy» degen uäj bıldırgenı aitylǧan. Alaida būl pıkırge qatysty resmi tüsınıkteme joq.
Zaŋǧar Kärımhan mūndai ärekettıŋ sebebı tüsınıksız ekenın, keşen tolyq būzylmaǧanymen, ülken ziian kelgenın atap öttı.
Jaǧdaiǧa bailanysty Soltüstık Qazaqstan oblysynyŋ Işkı saiasat basqarmasy resmi tüsınıkteme berdı.
«Mirnyi auyldyq okrugınıŋ aumaǧynda käsıpker Barlybaev Naǧaşybai Sabarūly Alaş qyzmetın eske alu maqsatynda stella ornatqan bolatyn. Alaida monument ekı sebepke bailanysty bölşektelıp, konservasiiaǧa qoiyldy: Stella tūrǧyzu kezınde mamandar topyraqtyŋ otyruyn tırkep, sonyŋ saldarynan qūrylystyŋ qisaiuy paida bolǧan. Mūndai jylju stellanyŋ ornyqtylyǧy men qauıpsızdıgıne kerı äser etuı mümkın edı. Qūjattardyŋ (arhitekturalyq-josparlau tapsyrmasy, bekıtılgen eskizdık joba) bolmauy. Memlekettık säulet-qūrylysty baqylau organy N.S. Barlybaevqa äkımşılık aiyppūl saldy», delıngen jauabynda.
Al oblys äkımınıŋ orynbasary Jüsıp Jūmaǧūlov būl ıske äkımdıktıŋ qatysy joq ekenın aitty.
"Jalpy būl käsıpker (Naǧaşybai Barlybaev) eşkımge eşteŋe aitpai qūrylysty özı bastaǧan, endı özı būzyp tastaǧan. Äkımdıktıŋ qatysy joq. Būǧan deiın de bırşama adamdar habarlasqan. Tekserıstı ötkızgennen keiın bız oǧan eşqandai jer telımı resmi türde berılmegenın, rūqsat qūjattary joq ekenın bıldık”, – dedı äkım orynbasary.
