2025 جىلعا ارنالعان ەرىكتى تۇردە قونىس اۋدارۋ باعدارلاماسى شەڭبەرىندە اباي وبلىسىنا 499 ادامعا كۆوتا بەكىتىلگەن. ونىڭ 244-ءى قانداستار، 255-ءى جۇمىس كۇشى ارتىق وڭىرلەردەن قونىس اۋدارۋشىلار.
وبلىستاعى 331 ەلدى مەكەننىڭ 316-سى قابىلداۋ اۋماعى رەتىندە ايقىندالعان. بۇگىنگى تاڭدا وڭىرگە 419 ادام قونىستاندى. ونىڭ 198-ءى قانداستار، 221-ءى ىشكى قونىس اۋدارۋشىلار.
ىشكى ميگراتسيا بويىنشا وبلىسقا نەگىزىنەن استانا قالاسى، تۇركىستان، جەتىسۋ جانە الماتى وبلىستارىنان ازاماتتار قونىس اۋدارۋدا. قانداستار موڭعوليا، قىتاي جانە وزبەكستان ەلدەرىنەن كوشىپ كەلىپ جاتىر.
باعدارلاما اياسىندا كەلۋشىلەرگە جالپى 226 ميلليون تەڭگە كولەمىندە مەملەكەتتىك قولداۋ كورسەتىلدى. مەملەكەتتىك قولداۋ شارالارى بويىنشا وتاعاسىنا جانە وتباسى مۇشەلەرىنىڭ ارقايسىنا 70 اەك كولەمىندە ءبىر رەتتىك كومەك، تۇرعىن ءۇيدى جالعا الۋ جانە كوممۋنالدىق قىزمەتتەردى وتەۋ ءۇشىن 15-30 اەك كولەمىندە تولەمدەر، تۇرعىن ءۇي ساتىپ الۋعا 50% مولشەرىندە، بىراق 1160 اەك-تەن اسپايتىن كولەمدە سەرتيفيكات بەرۋ قاراستىرىلعان.
قونىس اۋدارۋشىلار مەن قانداستار قاجەت بولعان جاعدايدا قىسقا مەرزىمدى كاسىپتىك وقىتۋعا جىبەرىلىپ، جۇمىسقا ورنالاسۋعا قولداۋ كورسەتىلەدى. ناتيجەسىندە بۇگىنگى كۇنگە دەيىن 95 ادام جۇمىسپەن قامتىلدى.
«ەڭبەك ۇتقىرلىعىن ارتتىرۋ ماقساتىندا اقپاراتتىق جۇمىستاردى كۇشەيتۋ جونىندەگى جول كارتاسى ىسكە اسىرىلىپ جاتىر. باعدارلاما اياسىندا تۇركىستان، جامبىل، الماتى، جەتىسۋ، قىزىلوردا، ماڭعىستاۋ وبلىستارىندا، سونداي-اق شىمكەنت، الماتى جانە استانا قالالارىندا قونىس اۋدارۋ جارمەڭكەلەرى وتكىزىلدى»، - دەيدى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى ايمان نۇرلىبەك.
2023 جىلى كوشى-قون ساياساتىن ىسكە اسىرۋ شەڭبەرىندە سەمەي قالاسىندا بەيىمدەۋ جانە ينتەگراتسيا ورتالىعى اشىلدى. ورتالىق قونىس اۋدارۋشىلاردىڭ جاڭا ورتاعا بەيىمدەلۋىنە جاردەمدەسەدى. ونىڭ ىشىندە قانداستارعا قازاق ءتىلى مەن جازۋدى وقىتاتىن ارنايى باعدارلامالار قاراستىرىلعان.
