قر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا شەتەلدەگى قازاقتارعا اشىلعان جاڭا مۇمكىندىكتەردى بايانداپ، قازاق كارتاسىنىڭ ەرەكشەلىكتەرىن ءتۇسىندىردى، دەپ حابارلايدى "ادىرنا" ۇلتتىق پورتالى.
ەندىگىدە شەتەلدەگى ەتنيكالىق قازاقتار ون جىل ۋاقىتشا قازاقستاندا تۇرا الادى. "قازاق كارتاسى" اتالاتىن جوبا قانداستاردىڭ ەجەلگى تامىرىن تاۋىپ، تاريحي وتانىمەن بايلانىسۋى ءۇشىن دايىندالعان. بۇل كارتانىڭ يەسى ساياسي قۇقىقتاردى قوسپاعاندا، ەل تۇرعىننىڭ قۇقىعىمەن بىردەي بولاتىن مۇمكىندىكتەرگە يە بولادى. ونداي مۇمكىندىكتەرگە ەلگە جەڭىلدەتىلگەن كىرۋ قۇقىعى (بيزنەس اشۋ، جىلجىمايتىن مۇلىككە جانە باسقا مۇلىككە يەلىك ەتۋ، قارجىلىق وپەراتسيالاردى جۇرگىزۋ) جاتادى.
«قانداستارىمىز جونىندە ەش ماسەلە جوق. ولاردىڭ كەلۋى بۇگىنگى تاڭدا قولدانىستاعى زاڭدا تولىق قامتىلعان. سونىمەن بىرگە، شەتتە جۇرگەن، ءوز بيزنەسى بار، بىراق ەلمەن تاريحي بايلانىستا بولعىسى كەلەتىن ەتنيكالىق قازاقتار دا بار. سوندىقتان "قازاق كارتاسى" دەگەن الەمدىك تاجىريبەدە بار كارتالاردىڭ ءبىرىن قولدانباقشىمىز. ونداعى نەگىزگى ءتۇيىن – ەگەر شەتەلدەگى ەتنيكالىق قازاق سول ەلدە تۇرا بەرەم، بىراق ەلىمە كەلىپ، بيزنەس اشىپ، ءوز ەلىمنىڭ دامۋىنا ۇلەس قوسام دەسە، ولاردىڭ كەلىپ-كەتۋىنە تولىق مۇمكىندىك بەرىلەدى جانە جەڭىلدەتىلگەن ۆيزالار بەرىلەدى، 10 جىلعا دەيىن ۋاقىتشا تۇرۋ مۇمكىندىگىن الادى»، - دەدى مينيستر ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
ودان بولەك، بيىلعى قر پرەزيدەنتىنىڭ كەزەكتى جولداۋىندا ەلىمىزدىڭ كوشى-قون ساياساتىنىڭ تيىمدىلىگىن ارتتىرۋ بويىنشا جاڭا شارالار پاكەتى ۇسىنىلعانى بەلگىلى.
