اقش ازىرلەگەن ۋكراينا بويىنشا بەيبىتشىلىك جوسپارى جەنەۆادا وتكەن كەلىسسوزدەردەن كەيىن تۇزەتۋلەرگە ۇشىرادى. بۇل تۋرالى The New York Times (NYT) گازەتى ءوزىنىڭ دەرەككوزدەرىنە سۇيەنە وتىرىپ جازدى، دەپ حابارلايدى “ادىرنا”.
باسىلىمنىڭ جازۋىنشا، 28 تارماقتان تۇراتىن قۇجات ۋكراينا مەن اقش دەلەگاتسيالارى اراسىنداعى تالقىلاۋلار بارىسىندا قايتا قارالعان. الايدا ەنگىزىلگەن وزگەرىستەردىڭ ناقتى مازمۇنى ازىرگە جاريا ەتىلمەگەن.
NYT دەرەگىنە سايكەس، رەسەي تاراپى تالقىلاۋ ءۇشىن قۇجاتتىڭ باستاپقى نۇسقاسىن العان. ءدال وسى العاشقى قۇجاتتى 20 قاراشادا ۋكراينالىق دەپۋتات الەكسەي گونچارەنكو جاريالاپ، ول كەيىن حالىقارالىق اقپارات قۇرالدارىندا كەڭ تالقىلاندى. ال جەنەۆاداعى كەلىسسوزدەردەن كەيىن تۇزەتىلگەن جاڭا نۇسقا ماسكەۋگە جولداندى ما، جوق پا – ازىرگە بەلگىسىز.
ۋكراينا مەن اقش دەلەگاتسيالارى اراسىنداعى كەزدەسۋ 23 قاراشادا جەنەۆادا ءوتتى. كەلىسسوزدەردىڭ باستى ماقساتى – تاراپتار اراسىنداعى كەلىسپەۋشىلىكتەردى ازايتۋ جانە جوسپاردىڭ داۋلى تۇستارىن ناقتىلاۋ بولعان.
كەلىسسوزدەر اياقتالعاننان كەيىن اقش مەملەكەتتىك حاتشىسى ماركو رۋبيو كەزدەسۋدى ۋكرايناداعى قاقتىعىستى رەتتەۋ باعىتىندا جۇرگىزىلگەن بارلىق ديپلوماتيالىق كۇش-جىگەر ىشىندەگى «ەڭ تابىستىسى» دەپ اتادى.
