AQŞ äzırlegen Ukraina boiynşa beibıtşılık jospary Jenevada ötken kelıssözderden keiın tüzetulerge ūşyrady. Būl turaly The New York Times (NYT) gazetı özınıŋ derekközderıne süiene otyryp jazdy, dep habarlaidy “Adyrna”.
Basylymnyŋ jazuynşa, 28 tarmaqtan tūratyn qūjat Ukraina men AQŞ delegasiialary arasyndaǧy talqylaular barysynda qaita qaralǧan. Alaida engızılgen özgerısterdıŋ naqty mazmūny äzırge jariia etılmegen.
NYT deregıne säikes, Resei tarapy talqylau üşın qūjattyŋ bastapqy nūsqasyn alǧan. Däl osy alǧaşqy qūjatty 20 qaraşada ukrainalyq deputat Aleksei Goncharenko jariialap, ol keiın halyqaralyq aqparat qūraldarynda keŋ talqylandy. Al Jenevadaǧy kelıssözderden keiın tüzetılgen jaŋa nūsqa Mäskeuge joldandy ma, joq pa – äzırge belgısız.
Ukraina men AQŞ delegasiialary arasyndaǧy kezdesu 23 qaraşada Jenevada öttı. Kelıssözderdıŋ basty maqsaty – taraptar arasyndaǧy kelıspeuşılıkterdı azaitu jäne jospardyŋ dauly tūstaryn naqtylau bolǧan.
Kelıssözder aiaqtalǧannan keiın AQŞ memlekettık hatşysy Marko Rubio kezdesudı Ukrainadaǧy qaqtyǧysty retteu baǧytynda jürgızılgen barlyq diplomatiialyq küş-jıger ışındegı «eŋ tabystysy» dep atady.
