اقش پرەزيدەنتى دونالد ترامپ اتىشۋلى قارجىگەر دجەففري ەپشتەيننىڭ قۇپيا فايلدارىن جاريالاۋعا باعىتتالعان زاڭ جوباسىنا قول قويدى، دەپ حابارلايدى «ادىرنا» ءتىلشىسى.
«مەن ەپشتەينگە قاتىستى قۇجاتتاردى جاريالاۋ تۋرالى زاڭعا قول قويدىم. بۇل ماتەريالداردىڭ جاريالانۋى ەپشتەيننىڭ 42-ءشى پرەزيدەنت بيلل كلينتونمەن، بۇرىنعى قارجى ءمينيسترى لارري ساممەرسپەن، LinkedIn نەگىزىن قالاۋشى ءارى دەموكراتيالىق پارتيانىڭ دەمەۋشىسى ريد حوففمانمەن، وكىلدەر پالاتاسىنداعى دەموكراتيالىق ازشىلىقتىڭ جەتەكشىسى حاكيم دجەففريسپەن جانە باسقا دا ادامدارمەن بايلانىستارى تۋرالى شىندىقتى اشادى»،- دەپ جازدى ترامپ Truth Social الەۋمەتتىك جەلىسىندە.
قول قويۋ ءراسىمى 19 قاراشا كۇنى اق ۇيدە ءوتتى. دۇيسەنبىدە وكىلدەر پالاتاسى زاڭ جوباسىن ماقۇلداپ، كەيىن سەنات ونى جەدەلدەتىلگەن تارتىپپەن سىرتتاي بەكىتكەن بولاتىن.
جەكسەنبىدە رەسپۋبليكالىق كونگرەسسمەن توماس ماسسي ەپشتەين فايلدارىنىڭ جاريالانباعان بولىگىندە كەمىندە 20 تانىمال ادامنىڭ ەسىمى بار ەكەنىن ايتىپ، ولاردىڭ قىلمىستارعا قاتىسى بولۋى مۇمكىن ەكەنىن، بىراق ازىرگە تەرگەۋگە الىنباعانىن مالىمدەدى. تىزىمدە ساياساتكەرلەر، ميللياردەرلەر جانە كينوپروديۋسەرلەر بار.
بۇعان دەيىن كونگرەسستەگى دەموكراتتار ەپشتەين ءارحيۆىنىڭ ءبىر بولىگىن جاريالاعان ەدى. الايدا زاڭ جوباسىنا قول قويىلعاننان كەيىن دە كەيبىر اقپارات قۇپيا بولىپ قالا بەرەدى. ولاردىڭ اراسىندا زورلىق قۇرباندارىن اشكەرەلەيتىن مالىمەتتەر نەمەسە بالا پورنوگرافياسىنا قاتىستى ماتەريالدار بولادى.
سونىمەن قاتار ترامپ اكىمشىلىگى تەرگەۋگە كەدەرگى كەلتىرەتىن ماتەريالداردى دا جاريالاۋدان الىپ تاستاۋى مۇمكىن.
قارجىگەر دجەففري ەپشتەين 2008 جىلى كامەلەتكە تولماعان قىزدى زورلاعانى جانە جەزوكشەلىكپەن اينالىسۋعا ارنالعان پريتوندى ۇيىمداستىرعانى ءۇشىن سوتتالعان. 2019 جىلدىڭ جازىندا اقش-تا قايتا ۇستالىپ، بىرنەشە جىنىستىق قىلمىسقا قاتىستى كوپتەگەن ايىپ ارقالادى. سول جىلى تامىزدا 66 جاستاعى ميللياردەر سوت شەشىمىن كۇتپەي، تۇرمەدە وزىنە قول سالدى. ونىڭ سەرىگى ءارى سىبايلاسى، ۇلىبريتانيا ازاماتشاسى گيسلەين ماكسۆەلل ادامداردى جىنىستىق قاناۋ ماقساتىندا ساۋداعا سالۋعا كومەكتەسكەنى ءۇشىن 20 جىلعا سوتتالىپ، قازىرگى كەزدە جازاسىن وتەپ جاتىر.
17 ملرد دوللارلىق مامىلەدەن – يبراھيم كەلىسىمىنە دەيىن. پرەزيدەنتتىڭ اقش-قا ساپارى نەلىكتەن ماڭىزدى؟
