قازاقستانداعى العاشقى اتوم ەلەكتر ستانتسياسىنا اتاۋ بەرۋ بويىنشا جالپىۇلتتىق كونكۋرس ءوز مارەسىنە جەتتى، دەپ حابارلايدى "ادىرنا".
بايقاۋ 2025 جىلعى 25 قىركۇيەك پەن 10 قازان ارالىعىندا eGov Mobile پلاتفورماسىندا ءوتتى.
كونكۋرس كوميسسياسىنىڭ قورىتىندى وتىرىسىنىڭ ناتيجەسىندە ەڭ كوپ ۇسىنىس جيناعان «بالقاش اتوم ەلەكتر ستانتسياسى» اتاۋى جەڭىمپاز دەپ تانىلدى. تاڭدالعان اتاۋ اتوم ەلەكتر ستانتسيالارىن گەوگرافيالىق بەلگى بويىنشا اتاۋ جونىندەگى حالىقارالىق تاجىريبەگە دە ساي كەلەدى.
كونكۋرسقا 16 جاستان اسقان 27 157 قازاقستاندىق قاتىستى. ءاربىر قاتىسۋشى ءبىر عانا اتاۋ نۇسقاسىن ۇسىنا الدى.
بارلىق ۇسىنىستاردىڭ ىشىنەن 10 460 بىرەگەي نۇسقا ىرىكتەلدى. وڭدەۋ بارىسىندا كيريلليتسا، لاتىن گرافيكاسى جانە سينونيمدىك سوزدەر ەسكەرىلدى.
كوميسسيا وتىرىسىندا ەڭ تانىمال 100 اتاۋ قارالدى. «بالقاش اتوم ەلەكتر ستانتسياسى» اتاۋىن 882 ازامات ۇسىنعان جانە ول ەڭ جوعارى رەيتينگكە يە بولىپ، كونكۋرس جەڭىمپازى اتاندى.
سونىمەن قاتار، كونكۋرس كوميسسياسى رەسمي اتاۋدىڭ ورىس جانە اعىلشىن تىلىندەگى نۇسقالارىن بەكىتتى:
- اتومنايا ەلەكتروستانتسيا «بالحاش»;
- Balkhash Nuclear Power Plant.
قازاقستاندا اەس قۇرىلىسى ءۇشىن 2024 جىلى 6 قازاندا رەفرەندۋم وتكىزىلدى. وندا داۋىس بەرگەندەردىڭ 71 پايىزدان استامى قۇرىلىستى قولداعان. الايدا سول كەزدە داۋىس بەرۋشىلەرگە، جالپى قوعامعا قازاقستاندا نەشە اەس سالىناتىنى ايتىلماعان. كەيىن ەلدە 3 بىردەي اەس سالىناتىنى بەلگىلى بولدى. ونىڭ العاشقىسىنا رەسەي قاتىسسا، ەكىنشىسىنىڭ قۇرىلىسىنا قىتاي كومپانياسىنىڭ ات سالىساتىنى ايتىلادى. العاشقى اەس شامامەن بالقاش كولىنىڭ جاعاسىنداعى سوۆەت كەزىندە گەس سالىنادى دەگەن تۇسقا سالىناتىن بولدى.
