قازاقستان مەن رەسەي اتوم ەلەكتر ستانتسياسىن (اەس) سالۋ بويىنشا ينديكاتيۆتى جول كارتاسىن بەكىتتى، دەپ حابارلايدى "ادىرنا" ۇلتتىق پورتالى.
بۇل تۋرالى اتوم ەنەرگياسى جونىندەگى اگەنتتىكتىڭ ءباسپاسوز قىزمەتى مالىمدەدى.
«2025 جىلعى 20 ماۋسىمدا سانكت-پەتەربۋرگ حالىقارالىق ەكونوميكالىق فورۋمىنىڭ اياسىندا قازاقستان رەسپۋبليكاسى اتوم ەنەرگياسى جونىندەگى اگەنتتىگىنىڭ باسشىسى الماسادام ساتقاليەۆ پەن رەسەيدىڭ «روساتوم» مەملەكەتتىك كورپوراتسياسىنىڭ باس ديرەكتورى الەكسەي ليحاچەۆ قازاقستان رەسپۋبليكاسىندا اتوم ەلەكتر ستانتسياسىن سالۋ جوباسىن جۇزەگە اسىرۋ ماسەلەلەرى بويىنشا كەزدەستى. كەزدەسۋ بارىسىندا ينجەنەرلىك-ىزدەستىرۋ جۇمىستارىن جۇرگىزۋدى، EPC-كەلىسىمشارت جاساۋدى جانە جوبالىق قۇجاتتامانى ازىرلەۋدى قامتيتىن جوبانى دايىنداۋ مەن جۇزەگە اسىرۋ كەزەڭدەرىن قاراستىراتىن ينديكاتيۆتى جول كارتاسى بەكىتىلدى»، – دەلىنگەن حابارلامادا.
سونىمەن قاتار، «قازاقستاندىق اتوم ەلەكتر ستانتسيالارى» جشس مەن «اتومسترويەكسپورت» اق (رف «روساتوم» مەملەكەتتىك كورپوراتسياسىنىڭ ينجينيرينگتىك كومپانياسى) اراسىندا الماتى وبلىسى جامبىل اۋدانىنداعى جوبانى ىسكە اسىرۋ بويىنشا ىنتىماقتاستىقتىڭ نەگىزگى قاعيدالارىن ايقىندايتىن نەگىزدەمەلىك كەلىسىمگە قول قويىلدى.
اگەنتتىكتىڭ مالىمدەۋىنشە، بۇل ستراتەگيالىق جوبا – بەيبىت ماقساتتاعى اتوم ەنەرگياسىن پايدالانۋ سالاسىنداعى مەملەكەتارالىق ىنتىماقتاستىق اياسىندا جۇزەگە اسىرىلادى جانە قازاقستاننىڭ ەنەرگەتيكالىق قاۋىپسىزدىگىن قامتاماسىز ەتۋ مەن ەل ەكونوميكاسىن دەكاربونيزاتسيالاۋعا باعىتتالعان ستراتەگيالىق ماقساتتاردى كوزدەيدى.
تاراپتار قازاقستان ءۇشىن ستراتەگيالىق ماڭىزعا يە بۇل جوبانى جۇزەگە اسىرۋدى جەدەل باستاۋ قاجەتتىگىن اتاپ ءوتتى.
«قازاقستان تاراپىنىڭ ەلىمىزدە اتوم ستانتسياسىن سالاتىن حالىقارالىق كونسورتسيۋمدى باسقارۋدى بىزگە سەنىپ تاپسىرعانىنا ريزامىز. قازاقستان – اتوم سالاسىنداعى سەنىمدى تاريحي سەرىكتەسىمىز. رەسەيلىك يادرولىق تەحنولوگيالار ءوزىنىڭ سەنىمدىلىگىمەن، قاۋىپسىزدىگىمەن جانە تيىمدىلىگىمەن دالەلدەنگەن، ولار قازاقستان حالقىنىڭ يگىلىگىنە جۇمىس ىستەپ، ەلدىڭ ەنەرگەتيكالىق ەگەمەندىگىن نىعايتادى دەپ سەنەمىز»، – دەدى الەكسەي ليحاچەۆ.
ال قازاقستان تاراپىنىڭ باسشىسى الماسادام ساتقاليەۆتىڭ ايتۋىنشا، ەلدە اتوم ستانتسياسىن سالۋ – ەنەرگەتيكا سالاسىن تۇراقتى دامىتۋعا باعىتتالعان كەشەندى ستراتەگيانىڭ ءبىر بولىگى.
ايتا كەتەيىك، 14 ماۋسىمدا قازاقستانداعى العاشقى اەس-ءتى رەسەيلىك «روساتوم» مەملەكەتتىك كورپوراتسياسى سالاتىنى بەلگىلى بولدى. ال ەكىنشى اەس-ءتى سالۋ ءۇشىن قىتايلىق كومپانيانىڭ ۇسىنىسى قارالىپ جاتىر. اتوم ەنەرگياسى جونىندەگى اگەنتتىك وكىلدەرىنىڭ ايتۋىنشا، «روساتوم» سالىپ جاتقان العاشقى اەس-كە قاتىستى باتىس سانكتسيالارىنىڭ اسەرى بولمايدى. ءبىرىنشى اەس-ءتى سالۋ مەرزىمى – 10–12 جىل.
