Reseilık täuelsız zertteu basylymy «Proekt» Mäskeudegı Vorobev taularyndaǧy elitalyq saiajailardyŋ Federaldyq küzet qyzmetı (FSO) arqyly bilıkke jaqyn saiasatkerler men biznesmenderge jalǧa berıletını turaly zertteu jariialady. Basylym deregınşe, osy jabyq kenttıŋ «tūrǧyndary» qatarynda Qazaqstannyŋ būrynǧy prezidentı Nūrsūltan Nazarbaev ta bar, dep habarlaidy "Adyrna".
Materialǧa süiensek, Kosygin köşesındegı būl elitalyq kent 1950 jyldary KSRO-nyŋ joǧary basşylyǧy – KOKP Ortalyq Komitetınıŋ müşelerı üşın arnaiy salynǧan. Ol «Mosfilm» pavilondary men Kino mūrajaiynyŋ däl janynda ornalasqan.
2015 jyly FSO aumaqtaǧy barlyq rezidensiialarǧa auqymdy rekonstruksiia jasaǧan. Sol uaqyttan berı saiajailar tek «jabyq tızım» arqyly – joǧary lauazym ielerınıŋ jeke rūqsatymen ǧana jalǧa berıledı.
«Proekt» mälımetınşe, būl kentke kıru tek Resei prezidentı Vladimir Putinnıŋ jäne onyŋ äkımşılık basşysy Anton Vainonyŋ rūqsatymen mümkın bolady. Elitalyq üidı jalǧa alu qūny aiyna şamamen 3,1 million rubldı qūraidy.
Nazarbaevpen bır tızımde körsetılgen körşıler mynalar:
- Qauıpsızdık keŋesınıŋ hatşysy Sergei Şoigu;
- Qorǧanys ministrınıŋ orynbasary – Bas ştab bastyǧy Valerii Gerasimov;
- Prezident äkımşılıgınıŋ basşysy Anton Vaino;
- Federasiia keŋesınıŋ müşesı Süleiman Kerimov;
- Oligarhtar Roman Abramovich, Gennadii Timchenko jäne Dmitrii Mazepin;
Ramzan Qadyrovqa jaqyn biznesmen Ruslan Baisarov.
Zertteu boiynşa, Nūrsūltan Nazarbaevqa Michurin daŋǧylyna jaqyn ornalasqan №2 üi bekıtılgen. Alaida ol būl rezidensiiada tūraqty tūrmaidy, tek mezgıl-mezgıl baryp tūrady dep körsetılgen.
Derekközderdıŋ aituynşa, būl üilerde tūru arnaiy jailylyq üşın emes, bilıkke jaqyndyqtyŋ simvoly retınde qabyldanady. Elitalyq tızımde Nazarbaevtyŋ boluy onyŋ Reseidıŋ yqpaldy tūlǧalary arasyndaǧy märtebesın körsetedı.
