قازاق حاندىعى كەزەڭىنە ارنالعان «قازاقستان تاريحى: ەجەلگى داۋىردەن بۇگىنگە دەيىن» اتتى اكادەميالىق تاريحتىڭ ءتورتىنشى تومى قايتا قارالدى، دەپ حابارلايدى “ادىرنا” ۇلتتىق پورتالى.
جەتى تومدىق اكادەميالىق باسىلىمنىڭ ءتورتىنشى تومىنىڭ قولجازباسى قايتا قارالعانى تۋرالى مەملەكەتتىك كەڭەسشى ەرلان قارين حابارلادى.
ونىڭ ايتۋىنشا، بۇعان دەيىن رەداكتسيا القاسى ەجەلگى داۋىرگە، تۇرىك كەزەڭىنە جانە التىن وردا تاريحىنا ارنالعان العاشقى ءۇش تومدى قاراپ، بەكىتكەن. كەزەكتى وتىرىستا ءتورتىنشى تومنىڭ جاڭارتىلعان تۇجىرىمداماسى، قۇرىلىمى مەن مازمۇنى تالقىلاندى.
تومنىڭ جاڭارتىلعان نۇسقاسىن باسىلىمنىڭ ۇيلەستىرۋشىسى، تاريح عىلىمدارىنىڭ دوكتورى، ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى، اكادەميك زيابەك قابىلدينوۆ تانىستىردى.
وتىرىستا پارلامەنت دەپۋتاتى، تاريح عىلىمدارىنىڭ دوكتورى، پروفەسسور ەركىن ءابىل، تاريح عىلىمدارىنىڭ كانديداتى كۇلگازيرا بالتاباەۆا جانە «قازاق تاريحي قوعامىنىڭ» باسقارما توراعاسى راديك تەمىرعاليەۆ رەتسەنزيالارىن ۇسىندى.
سونىمەن قاتار رەداكتسيا القاسىنىڭ مۇشەلەرى – حانكەلدى ءابجانوۆ، ايدوس سارىم، ايگۇل سادۋاقاسوۆا، مۇرات ءابدىروۆ، گالينا كسەنجيك، بەرەكەت كارىباەۆ، مامبەت قويگەلديەۆ، جاقسىلىق ءسابيتوۆ، ورازاق سماعۇلوۆ، ايبولات كۇشكىمباەۆ، ءسابيت شىلدەباي، اقان وڭعارۇلى جانە بەرىك ابدىعاليۇلى ءوز پىكىرلەرىن ورتاعا سالدى.
رەتسەنزەنتتەر ءتورتىنشى توم بويىنشا جۇرگىزىلىپ جاتقان جۇمىستىڭ ىلگەرىلەگەنىن اتاپ ءوتتى. رەداكتسيا القاسى قولجازبانى ودان ءارى پىسىقتاپ، جەلتوقسان ايىندا وتەتىن كەلەسى وتىرىستا قايتا قاراۋ جونىندە شەشىم قابىلدادى.
