گرۋزيانىڭ بۇرىنعى پرەزيدەنتى ميحايل سااكاشۆيلي ۋكراينا پرەزيدەنتى ۆلاديمير زەلەنسكيگە اشىق حات جولداپ، ءوزىن ازاماتتىق سوعىس تۇتقىنى رەتىندە تانىپ، ۋكرايناعا قايتارۋدى ءوتىندى، دەپ حابارلايدى "ادىرنا" ۇلتتىق پورتالى Informburo.kz-كە سىلتەمە جاساپ.
سااكاشۆيلي حاتىندا ءوزىنىڭ ۋكراينا ازاماتى ەكەنىن ەسكە سالعان. ايتۋىنشا، ونى جاقىندا تۇرمە اۋرۋحاناسىنان رۋستاۆي تۇرمەسىنە قايتا اۋىستىرعان. ول بۇل تۇرمەنى 2022 جىلدىڭ ناۋرىزىندا ءوزىن ۋلاعان قىزمەتكەرلەر جۇمىس ىستەيتىن مەكەمە دەپ سيپاتتايدى. ەكس-پرەزيدەنت بۇل ارەكەتتى ەلدىڭ "رەسەيلىك" باسشىلىعى ۇيىمداستىردى دەپ سانايدى.
«مەنىڭ قۋعىندالۋىم دا، تاعدىرىم دا سوعىسپەن بايلانىستى… مەنى گرۋزيانىڭ پرورەسەيلىك رەجيمى زاڭسىز ۇستاپ وتىرعان ازاماتتىق تۇتقىندار تىزىمىنە قوسۋىڭىزدى سۇرايمىن. ۋكرايندار ەشقاشان ءوز ادامىن تاستامايتىنىن بىلەمىن»، – دەپ جازدى سااكاشۆيلي.
12 قاراشادا ءۇش جارىم جىل بويى «ۆيۆامەد» كلينيكاسىندا ەم العان سااكاشۆيلي مەديتسينالىق كورسەتكىشتەر بويىنشا ەندى ستاتسيونارلىق ەمدى قاجەت ەتپەيدى دەگەن شەشىم شىعارىلعاننان كەيىن تۇرمەگە قايتا جەتكىزىلدى. دارىگەرلەردىڭ ايتۋىنشا، ول بۇل جاڭالىقتى سابىرمەن قابىلداعان.
ميحايل سااكاشۆيلي 2004–2013 جىلدارى گرۋزيا پرەزيدەنتى بولدى. 2013 جىلى ول گرۋزيا ازاماتتىعىنان باس تارتىپ، ۋكراينا ازاماتتىعىن قابىلدادى. 2021 جىلدىڭ 1 قازانىندا گرۋزياعا جاسىرىن كىرگەن ساتتە ۇستالىپ، بىرنەشە قىلمىستىق ءىس بويىنشا ايىپتالىپ، جالپى 12 جىل 6 ايعا سوتتالعان.
