مەملەكەت باسشىسى قاسىم-جومارت توقاەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ كەزەكتى وتىرىسى ءوتتى، دەپ حابارلايدى "ادىرنا" ۇلتتىق پورتالى اقورداعا سىلتەمە جاساپ.
وتىرىستا ىشكى جانە سىرتقى كوشى-قون سالاسىنداعى نەگىزگى ۇردىستەر قارالدى. جيىندا پرەمەر-ءمينيستردىڭ ورىنباسارى ەرمەك كوشەرباەۆ، ىشكى ىستەر ءمينيسترى، تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى، ەڭبەك جانە حالىقتى الەۋمەتتىك قورعاۋ ءمينيسترى ەسەپ بەردى.
پرەزيدەنت كوشى-قون ساياساتىن جۇزەگە اسىرۋ كەزىندە گەوساياسي فاكتورلار مەن قاۋىپتەردى، دەموگرافيالىق بولجامداردى جانە حالىق قوزعالىسىنىڭ سەبەپتەرىن ەسكەرۋدىڭ ماڭىزدىلىعىن اتاپ ءوتتى.
“مەملەكەت باسشىسى زاڭسىز كوشى-قونعا جول بەرمەۋ بويىنشا باقىلاۋدى كۇشەيتۋ جانە ەلىمىزدىڭ ادامي كاپيتالىن ارتتىرۋدى ىنتالاندىرۋ قاجەت ەكەنىن ايتتى”، – دەلىنگەن اقوردا حابارلاماسىندا.
وتىرىس بارىسىندا قاسىم-جومارت توقاەۆ كولىك سالاسىنداعى احۋالدى دا سىنعا الدى. پرەزيدەنت شەكارادا جۇك تاسىمالىنىڭ باياۋ جۇرگىزىلۋى، كوپتەگەن وتكىزۋ بەكەتتەرىنىڭ ناشار جاعدايدا ەكەنى جانە ءىرى ينفراقۇرىلىمدىق ترانزيتتىك جوبالاردىڭ مەرزىمىنەن كەشىگىپ جاتقانىن اتاپ ءوتتى.
