قۋات كوزىن ءوزى اۋىستىراتىن العاشقى روبوت-گۋمانويدتىڭ جاپپاي ءوندىرىسى باستالدى

قىتايلىق Ubtech Robotics كومپانياسى فلاگماندىق Walker S2 روبوت-گۋمانويدىن جاپپاي وندىرۋگە كىرىستى، دەپ حابارلايدى «ادىرنا» ءتىلشىسى.

ءوندىرىس قاراشانىڭ ورتاسىندا باستالىپ، جالپى قۇنى 800 ميلليون يۋاننان (شامامەن 53,6 ملرد تەڭگە – رەد.) اساتىن تاپسىرىستاردى ورىنداماق.

كومپانيا جاريالاعان بەينەروليكتە قاز-قاتار تىزىلگەن روبوتتار مەن ءوندىرىس تسەحتارى كورسەتىلگەن.

«قاراشانىڭ ورتاسى — باقىلاۋ، سەريالىق جونەلتۋدى باستاۋ»،-دەلىنگەن سيپاتتامادا.

ايتا كەتەيىك، Walker S2 روبوتى وندىرىستىك جانە لوگيستيكالىق مىندەتتەرگە ارنالعان. ونىڭ باستى ەرەكشەلىگى — اككۋمۋلياتورلاردى اۆتوماتتى تۇردە الماستىرۋ جۇيەسى, بۇل قۇرىلعىعا ادام كومەگىنسىز جانە ءۇزىلىسسىز جۇمىس ىستەۋگە مۇمكىندىك بەرەدى.

Ubtech كومپانياسى مۇنداي تەحنولوگيانىڭ روبوت-گۋمانويدتار اراسىندا الەمدە العاش رەت ىسكە اسقانىن مالىمدەدى.